რუბრიკები
ოჯახის მკურნალი
ალერგიული სინჯები
ალერგიული სინჯები
თუ ალერგიული დაავადება გაწუხებთ, ექიმთან ვიზიტი არ გეყოფათ - ალერგიული სინჯების ჩატარებაც მოგიხდებათ. ეს გამოკვლევა ზუსტი დიაგნოზისთვის არის აუცილებელი. თითოეული ალერგიული დაავადებისთვის შემუშავებულია გამოკვლევათა განსაზღვრული გეგმა, თუმცა ყოველ კერძო შემთხვე-ვაში, სხვადასხვა ფაქტორის გათვალისწინებით, ამა თუ იმ მეთოდს ენიჭება უპირატესობა. სწორი დიაგნოზი, წესისამებრ, გამოკვლევათა კომპლექსს ეფუძნება, ერთი ანალიზი ამისთვის არ კმარა. ალერგიულ დაავადებათა დიაგნოსტიკის მეთოდებს შორის ყველაზე მნიშვნელოვანი ალერგოსინჯებია. ამ მეთოდებს შორის არის კანის რაოდენობრივი და ხარისხობრივი სინჯები, აგრეთვე - პირდაპირი, არაპი-რდაპირი და პროვოკაციული სინჯები. ამ მეთოდების მთავარი და საერთო ნიშანი ის არის, რომ ალერგე-ნი, რომელიც დაავადების პოტენციურ გამომწვევად განიხილება, ამა თუ იმ გზით შეჰყავთ პაციენტის ორგანიზმში, შემდეგ კი აკვირდებიან და მის მიმართ ორგანიზმის რეაქციას აფასებენ. სინჯებს, როგორც წესი, მდგომარეობის გაუმჯობესების პერიოდში ატარებენ. ამ დროს მწვავე ალერგიული რეაქციიდან 2-3 კვირა მაინც უნდა იყოს გასული. ალერგოსინჯებსა და ზოგადად ალერგოდიაგნოსტიკაზე გვესაუბრება ვაკის სამკურნალო დიაგნოსტიკური ცენტრის მაღალტექნოლოგიური დიაგნოსტიკური ლაბორატორიის ექიმი ლაბორანტი შორენა კვარაცხელია:

- თქვენი ლაბორატორიის მონაცემებით, როგორია სტატისტიკა, ყველაზე ხშირად რომელ ალერგენებზე უვითარდებათ პაციენტებს ალერგიული რეაქცია?

- ჩვენს ლაბორატორიაში უმთავრესად ტარდება სისხლის ანალიზი სხვადასხვა ანტიბიოტიკსა და საანესთეზიო პრეპარატზე ალერგიულ რეაქციათა გამოსავლენად. პაციენტებს უმეტესად სტომატო-ლოგები, სხვადასხვა პროფილის ქირურგები და ანესთეზიოლოგები აგზავნიან. ალერგიულ რეაქციათა გახშირების ფონზე გართულებათა თავიდან ასაცილებლად ქირურგიული მანიპულაციების ჩატარებამდე, ამა თუ იმ პრეპარატის დანიშვნამდე აუცილებლად უნდა შემოწმდეს ადამიანის ორგანიზმის მგრძნობე-ლობა პრეპარატისადმი. საანესთეზიო საშუალებებიდან მგრძნობელობა მოწმდება ნოვოკაინის, ლიდო-კაინის, უბისთეზინის, ულტრაკაინის, სკანდონესტის, სეპტანესტის და ყველა იმ პრეპარატის მიმართ, რომლებსაც ყველაზე ხშირად იყენებენ სამედიცინო პრაქტიკაში. იგივე ითქმის ანტიბაქტერიულ  პრეპარატებზეც. მოგეხსენებათ, დღეს ანტიბიოტიკების ბუმია და არის შემთხვევები, როდესაც სამკურნალოდ დანიშნული წამალი მძიმე გართულებათა გამო ადამიანისთვის საზიანო და მომაკვდი-ნებელიც კი ხდება.

- როგორ ადგენთ სისხლის მიხედვით ორგანიზმის მომატებულ მგრძნობელობას ამა თუ იმ პრეპარატის მიმართ?

- სისხლს ვიღებთ უზმოზე. ვენიდან აღებულ ჰეპარინიზებულ სისხლს სპეციალურ სინჯარებში ვათავსებთ, ვამატებთ სასინჯი ნივთიერებების 2-3 წვეთს (ჩვეულებრივ, ეს ის მედიკამენტებია, რომლებსაც იყენებენ ექიმები, ანუ რომელთა მიმართ რეაქციაც აინტერესებთ და ითხოვენ ანალიზს). ამის შემდეგ სინჯარები თერმოსტატში თავსდება, თერმოსტატიდან გამოღებისა და 3%-იანი ძმარმჟავას ხსნარის დამატების შემდეგ კი ხდება სისხლში ლეიკოციტების რაოდენობის განსაზღვრა. საკონტროლო და საცდელ სინჯარებში არსებული სისხლის ლეიკოციტების დათვლა, მათი შეფარდებითი ანალიზი საშუალებას იძლევა განისაზღვროს, რამდენად არის მომატებული ამა თუ იმ სასინჯი ნივთიერებისადმი ორგანიზმის მგრძნობელობა, რა პროცენტული  ოდენობით არის დასაშვები ორგანიზმში მისი მოხვედრა (გამოხატული ალერგიული რეაქციის შემთხვევაში, ჩვეულებრივ,  საცდელ სისხლში ლეიკოციტების რაოდენობა საკონტროლო მაჩვენებლთან შედარებით შემცირებულია მათი ლიზისის - დაშლის - გამო).

- რას გვეტყოდით სისხლში სპეციფიკური ანტისხეულების განსაზღვრაზე?

- მოგეხსენებათ, ორგანიზმის მომატებულ მგრძნობელობას (სენსიბილიზაციას), ზოგადად, ალერგიულ ფონს იმუნური სისტემის განსაზღვრული ცვლილებები (დარღვევები) იწვევს. საყოფაცხოვრებო, მცენარეული, ეპიდერმული, საკვები თუ სხვა სახის ალერგენებისადმი ალერგიას, უწინარეს ყოვლისა, სისხლში E კლასის ანტისხეულების (Iგ იმუნოგლობულინების) მომატება ახასიათებს. ჯანმრთელი ადამიანის სისხლში E იმუნოგლობულინების კონცენტრაცია,

ჩვეულებრივ, უმნიშვნელოა, ალერგიული დაავადების მქონეთა სისხლში კი სპეციფიკური IგEანტისხეულების დონე მკვეთრად არის მომატებული, რასაც თავისთავად დიდი დიაგნოსტიკური მნიშვნელობა აქვს. სისხლის ანალიზი, ისევე როგორც კანის სინჯები, იმაზე მიუთითებს, რომელმა ალერგენმა შეიძლება გამოიწვიოს ალერგიული რეაქცია, თუმცა ამა თუ იმ ალერგენის მიმართ დადებითი რეაქციის გამოვლენის შემთხვევაშიც კი არ შეიძლება, ალერგიულ დაავადებაზე ერთმნიშვნელოვნად ვიმსჯელოთ, ისევე როგორც უარყოფითი პასუხი არ გამორიცხავს ალერგიული რეაქციის განვითარების შესაძლებლობას. გამოკვლევის შედეგები ყველა შემთხვევაში უნდა შეჯერდეს დაავადების კლინიკურ სურათთან, რაც სწორედ ალერგოლოგთა კომპეტენციაა.

- პაციენტებს ხშირად უნიშნავენ კანის სინჯებს. რომელი მეთოდი უფრო სარწმუნოა დიაგნოსტიკის თვალსაზრისით, სისხლის ანალიზი თუ კანის ტესტი?

- ტესტირების არსი ასეთია: სავარაუდო ალერგენის უმცირეს დოზას ათავსებენ კანის ზედაპირზე ან შეჰყავთ კანქვეშ, რათა გაირკვეს, აღმოცენდება თუ არა ლოკალური დადებითი რეაქცია შეწითლების ან შესიების სახით. კანის ამ უბნის შეწითლება და მცირედი (კოღოს ნაკბენის მსგავსი) შეშუპება დადებითი რეაქციის მანიშნებელია (ეს გამოვლინებანი, გარდა იმისა, რომ ადასტურებს გამოყენებული ალერგე-ნისადმი ორგანიზმის მგრძნობელობას, გარკვეულწილად მგრძნობელობის ხარისხზეც მიუთითებს). კანის სინჯის ჩატარებიდან სულ მცირე 30 წუთის განმავლობაში პაციენტი ექიმის დაკვირვების ქვეშ უნდა იყოს. თუ სინჯმა დადებითი რეაქცია გამოავლინა, სპეციალისტი შეისწავლის (აკვირდება და ზომავს) სიწითლესა და შესიებას, რითაც, ფაქტობრივად, განსაზღვრავს მოცემული ალერგენისადმი მგრძნობე-ლობის ხარისხს (დონეს). ამის საფუძველზე ექიმი წყვეტს, სჭირდება თუ არა პაციენტს იმუნოთერაპიის შესაბამისი კურსის ჩატარება. სწორედ ალერგენისადმი მგრძნობელობის ხარისხის გათვალისწინებით ხდება ალერგიის საწინააღმდეგო მკურნალობის კურსის შერჩევა.

- რა სახის ტესტები არსებობს და რა შემთხვევაშია მიზანშეწონილი მათი გამოყენება?

- ალერგიის დიაგნოსტიკისთვის, ჩვეულებრივ, ორგვარი კანის სინჯი გამოიყენება: პრიკ ტესტი და სკარიფიკაციული ტესტი. პრიკ ტესტი კანშიგა ნემსის მეთოდია. მას სხვაგვარად ინტრადერმულ (კანშიგა) სინჯს უწოდებენ. ამ დროს ალერგენის მცირე დოზა წინამხარზე (ზოგჯერ ხელისგულზეც) კანის ზედაპირული შრის ქვეშ შეჰყავთ. სკარიფიკაციულ ტესტს ნაკაწრის სინჯსაც უწოდებენ. ის ზურგის ან წინამხრის კანზე კეთდება. სავარაუდო ალერგენის შემცველ ხსნარს კანზე აწვეთებენ, კანს სპეციალური ინსტრუმენტით ოდნავ კაწრავენ ან ჩხვლეტენ (ისე, რომ სისხლმა არ გამოჟონოს), განსაზღვრული პერიო-დის შემდეგ კი ამ უბანზე აღმოცენებულ ალერგიულ რეაქციას აფასებენ. პროცედურის სიმარტივისთვის სპეციალური ერთჯერადი სტერილური აპლიკატორებია შექმნილი. ორივე ტესტის შემთხვევაში დადე-ბითი რეაქცია დაახლოებით 20 წუთში ვლინდება. ზუსტი დიაგნოზისთვის ხშირად ათეულობით ტესტის ჩატარება ხდება საჭირო.

- შეიძლება თუ არა, კანის სინჯებს გართულება მოჰყვეს?

- ვინაიდან კანშიგა სინჯები ალერგენის უშუალოდ კანში შეყვანას გულისხმობს, მათი განხორციელებისას არსებობს როგორც ადგილობრივი, ისე სისტემური რეაქციის განვითარების საფრთხე. ზოგჯერ სინჯის ჩატარების უბანზე ვრცელი შეშუპება, კანის დაბუჟება და სხვა სიმპტომები აღმოცენდება, მოსალოდნელია ზოგადი სიმპტომებიც - ხველა, ცხვირცემინება, თვალების წვა, სულხუთვის შეგრძნება, სიმძიმის შეგრძნება გულმკერდის არეში და სხვა. ამიტომაც კანშიგა სინჯებამდე ხშირად სკარიფიკაციულ ტესტებს ატარებენ. ეს უკანასკნელი შედარებით ნაკლებ საშიშია.

- აქვს თუ არა კანის სინჯებს უკუჩვენება?

- თუ პაციენტი ანტიჰისტამინური პრეპარატებით ან სხვა მედიკამენტებით მკურნალობს, სინჯების ჩატარებამდე რამდენიმე დღით ადრე წამლების მიღება უნდა შეწყვიტოს - აღნიშნული მედიკამენტები ალერგენისადმი ორგანიზმის მგრძნობელობას ცვლის, ამიტომ ტესტის პასუხი შესაძლოა მცდარი აღმოჩნდეს. ანტიჰისტამინური ეფექტის გამო კანის სინჯის შედეგებზე თავისებურ გავლენას ახდენს ზოგიერთი ანტიდეპრესანტიც. თუ ასეთი პრეპარატით მკურნალობთ, კანის სინჯების ჩატარებამდე აუცილებლად უნდა გაიაროთ კონსულტაცია მკურნალ ექიმთან. თუ ის ნებას დაგრთავთ, უმჯობესია, მედიკამენტის მიღება ტესტის ჩატარებამდე 5-7 დღით ადრე შეწყვიტოთ (შესაძლოა, ეს არც დაგჭირდეთ - ექიმმა, უბრალოდ, პრეპარატი შეგიცვალოთ). კანის სინჯების ჩატარებისას აუცილებლად უნდა იქნეს გათვალისწინებული ისეთი დაავადებები, როგორიც არის დერმატიტი, ეგზემა, ფსორიაზი, კანის სხვა პათოლოგიები (გაღიზიანება, დაზიანება და სხვა), რომლებმაც შესაძლოა გავლენა მოახდინოს ტესტის შედეგებზე.

- რას გულისხმობს და რა თავისებურებით გამოირჩევა პროვოკაციული სინჯები?

- პროვოკაციული სინჯები ალერგოლოგიური ანამნეზისა და კანის სინჯების შედეგების შეუსაბამობისას ტარდება. ამ დროს ალერგიულ რეაქციას იწვევენ ალერგენის უშუალოდ იმ ქსოვილში ან ორგანოში შეყვანით, რომლის უპირატესი დაზიანებაც არის წამყვანი დაავადების კლინიკურ სურათში. განასხვა- ვებენ კონიუნქტივურ (ალერგიული კონიუნქტივიტების დროს), ნაზალურ (ალერგიული რინიტებისა და პოლინოზების დროს), ინჰალაციურ (ბრონქული ასთმის დროს) პროვოკაციულ სინჯებს.

 

 

 

კომენტარი არ გაკეთებულა
კომენტარი
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას,სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.
ალკოჰოლის ხშირი მოხმარება ჯანმრთლობისთვის მავნებელია, თუმცა დღესასწაულებზე სასმელზე უარის თქმა ზოგჯერ შეუძლებელია. დღესასწაულებისთვის მომზადებაა საჭირო. რამდენიმე დღით ადრე, იოდშემცველი პროდუქტების მიღებაა რეკომენდებული (ზღვის კომბოსტო, ზღვის თევზი, ზღვის პროდუქტები, ფეიხოა).
ექიმი გრეგორი ჰაუსი ყველაზე პოპულარული ექიმია მსოფლიოში მიუხედავად იმისა, რომ ის სატელევიზიო სერიალის გმირია. ყველაზე პოპულარულ გამოგონილ პერსონაჟებს შორის ის ერთ-ერთ მოწინავე პოზიციას იკავებს.
ექსპერიმენტი ჩატარდა მღრღნელებზე. მეცნიერები საცდელ ცხოველებს წონის დასაკლებად ფიზიკურ ვარჯიშს აიძულებდნენ. აღმოჩნდა, რომ მამრები, მდედრებთან შედარებით, ფიზიკური ვარჯიშის დახმარებით, უფრო ადვილად იკლებდნენ წონაში. აღსანიშნავია, რომ დატვირთვის დონე და კვება იდენტური იყო.
ამ კატეგორიის სხვა სტატიები
ამერიკელმა მკვლევარებმა აღმოაჩინეს ცილა, რომელიც დაკავშირებულია ასთმის მძიმე ფორმით დაავადებული პაციენტების სასუნთქი გზების შევიწროების პროცესთან. შესაძლებელია მეცნიერების ამ აღმოჩენამ ასთმის სამკურნალო ახალი წამლის შექმნას ჩაუყაროს საფუძველი.
ბევრი უჩივის ხველას, ყელის სიმშრალეს, თვალებიდან ცრემლდენას, რაც ბალიშის ბინადარი ტკიპის ცხოველმყოფელობის პროდუქტებზე ალერგიის სიმპტომების გამომწვევი შეიძლება გახდეს. როგორც ცნობილია, კანის მილიონობით მკვდარი უჯრედი, ყოველდღიურად ხვდება თეთრეულზე. ამ უჯრედებით იკვებება მტვრის ტკიპა.
პიტსბურგის მეცნიერთა ჯგუფმა დაადგინა, რომ ბრონქული ასთმით დაავადებულებს ხშირად აღენიშნებათ ძილის დარღვევა. ეს უკანასკნელი ხელს უშლის პაციენტებს ასთმის შეტევათა გაკონტროლებაში, რაც თავის მხრივ, მძიმე გართულებათა მიზეზი შეიძლება გახდეს. 
მაიოს კლინიკის სპეციალისტები მივიდნენ დასკვნამდე, რომ ბავშვთა ასთმური შეტევის მიზეზი ხშირად მშობელთა მავნე ჩვევა - თამბაქოს მოხმარებაა. ისინი მოუწოდებენ მოზრდილებს, მოარიდონ ბავშვები თამბაქოს კვამლს. მეცნიერებმა გააანალიზეს ამ თემასთან დაკავშირებით ჩატარებული 25 კვლევის შედეგები. აღნიშნულ კვლევებში მონაწილეობდა 430 000-ზე მეტი ბავშვი, რომელთა საშუალო ასაკი 6-7 წელიწადს შეადგენდა.
ალერგენსპეციფიკური იმუნოთერაპია ბავშვებთან გულისხმობს იმუნოთერაპიას ალერგენებით, იგივე სპეციფიკურ ალერგოვაქცინაციას.

საზოგადოდ, ალერგიას საფუძვლად უდევს ორგანიზმის მომატებული (გადაჭარბებული) რეაქცია ამა თუ იმ ნივთიერებაზე (მცენარეთა და ოთახის მტვერი, საკვები პროდუქტები, მედიკამენტები და სხვა). ალერგიის შემცირებისა და შესაბამის გამოვლინებათა შესასუსტებლად გამოიყენება სამკურნალო პრეპარატები და ასევე ალერგენსპეციფიკური იმუნოთერაპია. ეს უკანასკნელი გულისხმობს ორგანიზმში ალერგენის თანდათანობით, მზარდი დოზებით განმეორებით შეყვანას.

მიკრობიოლოგიის პროფესორმა, ნობელის პრემიის ლაურეატმა ბარი მარშალმა ასთმისა და კვებისმიერი ალერგიის პრევენციის ახალი საშუალება შეიმუშავა. მან უნდა დათრგუნოს ზედმეტად აქტიური იმუნური სისტემა. მეცნიერის თქმით, ამ სამუშაოს საწყისი ჰელიკობაქტერიაზე მიმდინარე კვლევები აღმოჩნდა.
09 თებერვალი 2017
ბევრი ფიქრობს, რომ ადამიანები, რომლებიც ხშირად იღებენ სელფს, ნარცისიზმით არიან შეპყრობილები. თუმცა, ტეხასის უნივერსიტეტის მეცნიერების მიერ ჩატარებულმა კვლევებმა აჩვენა, რომ ეს ყოველთვის ასე არ არის. ამ ადამიანებს სხვა მოტივიც შეიძლება ამოძრავებდეთ.
28 დეკემბერი 2016
სტენფორდის უნივერსიტეტის გენეტიკოსები აცხადებენ, რომ უახლოეს პერიოდში ბავშვის ჩასახვისათვის კაცობრიობას სექსი აღარ დასჭირდება. მეტიც, პოტენციურ მშობლებს ბავშვების შერჩევა არა მხოლოდ სქესის, არამედ სხვა ნიშნების მიხედვითაც შეეძლებათ.
ადამიანის ტვინი მიდრეკილია სწრაფი დასკვნების გაკეთებისკენ, მაშინაც კი, თუ ეს უსაფუძვლო ნეგატიურ შეფასებას ნიშნავს. სპეციალისტებმა გაარკვიეს, რომ როდესაც ადამიანს აძლევენ ადამიანების მითიურ ჯგუფზე ნეგატიურ ინფორმაციას
საშინაო საქმეები სპორტდარბაზში ვარჯიშის შემცვლელია. სპეციალისტებმა დათვალეს რამდენი კალორიის დაწვაა შესაძლებელი ჩვეული საშინაო საქმიანობის დროს. ასე მაგალითად, საწოლის გასწორებისას ადამიანი წვავს 70 კალორიას, რაც ერთი ორცხობილას ეკვივალენტია.
ეჭვიანობა აქვეითებს ყურადღებას, ხელს უშლის მნიშვნელოვან საკითხებზე ყურადღების კონცენტრირებას. გარდა ამისა, ეჭვიანობის გრძნობა იწვევს სტრესის, შფოთისა და დეპრესიის სიმპტომების გამოვლენას