რუბრიკები
ოჯახის მკურნალი
კითხვა-პასუხი
სმენის დაქვეითება და მისი კორექციის მეთოდები
სმენის დაქვეითება და მისი კორექციის მეთოდები

- ყურის ქრონიკულად მიმდინარე ანთებითი პროცესი (მაგალითად, მოცურავეებში) თუ არის საფუძველი სმენის დაქვეითებისა? შეიძლება, ამ ფონზე ერთ მშვენიერ დღეს ადამიანმა უცაბედად სმენა დაკარგოს?


- რა თქმა უნდა, ქრონიკული ანთება გარკვეულ ეტაპზე შესაძლოა სმენის დაქვეითების საფუძველი გახდეს. ამიტომაც ყველა შემთხვევაში საჭიროა გარეთა ან შუა ყურის ანთების მკურნალობა, რათა პათოლოგიური პროცესი შიგნითა ყურზე არ გადავიდეს. თუმცა უეცარი სიყრუის მიზეზი ძირითადად სისხლის მიმოქცევის მწვავე დარღვევაა, სისხლძარღვის შევიწროებით ან სხვა მიზეზით გამოწვეული. თუ ამ შემთხვევაში სათანადო მკურნალობა დროულად დაიწყო, დიდია შანსი, სმენა სრულად თუ არა, ნაწილობრივ მაინც აღდგეს. არსებობს სპეციალური მკურნალობა ბელგიური მეთოდით, რომელიც დანერგილია და ძალიან კარგი ეფექტიც აქვს, მით უფრო - დროულად დაწყების შემთხვევაში. ფაქტობრივად, ეს არის ინტრავენური ინფუზიები (გადასხმები) სხვადასხვა ნივთიერებისა, რომლებიც აუმჯობესებს სისხლის მიმოქცევას, აძლიერებს ნეიროტრანსმიტერების ფუნქციას. თუმცა ამ მკურნალობას მხოლოდ პირველივე დღეებში, პირველივე კვირას აქვს შედეგი, ამიტომაც სმენის დაქვეითების შემთხვევაში საჭიროა დროულად მივაკითხოთ ექიმ სპეციალისტს, ნაცვლად იმისა, რომ თვეობით, მით უფრო წლობით ვიცადოთ - ამით პათოლოგიური პროცესი მხოლოდ ღრმავდება. ძალიან მნიშვნელოვანია ანტიბიოტიკოთერაპიის გართულებებიც. გერმანიაში ჩემი მრავალწლიანი მოღვაწეობის პერიოდში, მახსოვს, დრეზდენის ოტოლარინგოლოგიური კლინიკიდან ერთადერთხელ წავედით რომელიღაც სოფელში, რომ გენტამიცინით გამოწვეული სმენაჩლუნგობა გვენახა და დაგვეფიქსირებინა, მაშინ როცა საქართველოში ეს მოვლენა ძალზე ხშირია. გული მტკივა, რომ ჩვენი პედიატრები ასე ხელაღებით და ადვილად ნიშნავენ კანამიცინს, გენტამიცინს და სხვა პრეპარატებს, რომლებიც აზიანებს სმენის აპარატს. მართალია, არსებობს ანტიბიოტიკები, რომლებიც კარგად მოქმედებს ფილტვებზე, კუჭსა და სხვა ორგანოებზე, მაგრამ არ უნდა დაგვავიწყდეს სმენის აპარატზე მათი მავნე და დამღუპველი ზემოქმედება. ეს პრეპარატები დიდი სიფრთხილით უნდა დაინიშნოს, აუცილებლად ოტოლოგთან შეთანხმებით, რათა შედეგად მძიმე გართულება არ მივიღოთ.


- თანდაყოლილ სიყრუეზე რას გვეტყვით, როგორ ხდება მისი დიაგნოსტიკა?


- თანდაყოლილი სიყრუე შეიძლება იყოს გენეტიკური - მშობლებს ჰქონდეთ სმენის დაქვეითება და შვილსაც გადაეცეს. საერთოდ, როცა გენეტიკა დატვირთულია - ბაბუას ან იმის ბაბუას ჰქონდა სმენასთან დაკავშირებული პრობლემა, როდის, რომელ თაობაში იჩენს ის თავს, არავინ იცის. გარდა ამისა, არსებობს მუცლადყოფნის პერიოდში შეძენილი სიყრუე. მაგალითად, ორსული გადაიტანს რომელიღაც დაავადებას, გრიპს ან კიდევ ციტომეგალოვირუსულ ინფექციას და თითქოს საგანგაშო არაფერია, არაფერს უჩივის, არც არაფერი აღენიშება, ბავშვი კი სმენადაქვეითებული იბადება. საყურადღებოა, რომ როდესაც ამერიკასა და ევროპის მოწინავე ქვეყნებში ბავშვი იბადება, მას არა მხოლოდ ზომავენ და წონიან, არამედ სმენასაც უმოწმებენ. მიხარია, რომ ჩვენ კარგად ვართ ინტეგრირებული მსოფლიო პრაქტიკაში და დღეს ეს ჩვენთანაც ხორციელდება. ყოველ შემთხვევაში, არსებული პროგრამით თბილისში დაბადებული ყველა ახალშობილი გადის აღნიშნულ შემოწმებას. მე მინდა, რომ ეს მთელი საქართველოს მასშტაბით ხორციელდებოდეს. ამაზე აუდიოლოგიის ცენტრი აქტიურად მუშაობს. მთავარი პრობლემა ძვირადღირებული სკრინინგის აპარატების სიმცირეა. ის ათი აპარატიც, რომლებიც სამშობიარო სახლებს გადავეცით, გერმანელებმა და ჰოლანდიელებმა გვაჩუქეს. როგორც მოგახსენეთ, ახალშობილთა სკრინინგში აუდიოლოგიის ცენტრი აქტიურად არის ჩართული. სმენადაქვეითებული ბავშვები აღრიცხვაზე აგვყავს, მერე მეორეულ სკრინინგს ვუტარებთ, დიაგნოზს ვაზუსტებთ და შესაბამისად ვმკურნალობთ. სმენის დაქვეითებას რაც შეიძლება ადრე უნდა მივხედოთ, რადგან თუ სასმენმა აპარატმა ან კოხლეარულმა იმპლანტაციამ დაიგვიანა, მაგალითად, 5 ან 7, მით უფრო 10 წლიდან ჩაერთო, სათანადო ეფექტს ვეღარ მოახდენს და სასურველ შედეგს არ გამოიღებს. სმენის კორექცია იმ პერიოდში უნდა მოხდეს, როდესაც მეტყველება იწყება (დაახლოებით 2-3 წლიდან). ახალშობილთა სკრინინგი აუცილებელია, რადგან ჩვილს მშობელი, როგორ წესი, ვერ ატყობს სმენის დაქვეითებას. ამას, ჩვეულებრივ, 2 წლისთვის ამჩნევენ - ეძახიან ბავშვს და ის არ რეაგირებს, არ აქვს საპასუხო რეაქცია ხმაურზე და ასე შემდეგ. ასეთ დროს საჭიროა სმენის გამოკვლევა. ინდივიდს აწვდიან ბგერას და ეკითხებიან, გაიგო თუ არა. ბუნებრივია, 5-6 წლამდე ასაკის ბავშვებში ეს მეთოდი შედეგიანი არ არის, ამიტომაც ტარდება ობიექტური აუდიომეტრია. ეს უკანასკნელი გამოსაკვლევი პირის ნება-სურვილზე კი არ არის დამოკიდებული, არამედ ეფუძნება იმ რეაქციას, რომელსაც ბგერა იწვევს. გამოწვეული პოტენციალები კომპიუტერულად, გასაშუალების მეთოდით იწერება. მძინარე (ან ანესთეზიით დაძინებულ) ბავშვს მიეწოდება სხვადასხვა სიხშირის ბგერა. თუ მიიღება გამოწვეული პოტენციალები, ესე იგი, სმენა შენარჩუნებულია, თუ არადა - არა. აუდიოგრამის საფუძველზე ხდება სმენის დაქვეითების, მისი ხარისხისა და სიმძიმის დადგენა, შესაბამისად, შეირჩევა სასმენი აპარატი ან დაისმის კოხლეარული იმპლანტაციის საკითხი. სასმენი აპარატის დროულად გამოყენებას უდიდესი მნიშვნელობა აქვს, არა მხოლოდ იმისთვის, რომ ბავშვმა გაიგოს ბგერები და, შესაბამისად, ჩამოუყალიბდეს მეტყველება, არამედ იმისთვისაც, რომ სმენის დარჩენილი რეცეპტორები მაქსიმალურად შეუნარჩუნდეს. თუ დარჩენილმა რეცეპტორებმა არ იფუნქცია, რეტროგრადულად მათი ფუნქციური დეგენერაციაც მოხდება. მე ხშირად მომყავს ასეთი მაგალითი: როდესაც მიმდინარეობს კუნთის ატროფია, ნევროლოგები პაციენტებს მოძრაობას და რაც შეიძლება მეტ დატვირთვას ურჩევენ, რათა მაქსიმალურად შენარჩუნდეს კუნთისა და მისი მამოძრავებელი ნერვის ფუნქცია. ასევეა ყურის შემთხვევაში. ყური იქნება ეს, კუნთი თუ ტვინი, ყველაფერს დატვირთვა და მუშაობა სჭირდება. წინააღმდეგ შემთხვევაში ის ატროფირდება, ფუნქციურ დეგენერაციას განიცდის. სამწუხაროდ, ზოგიერთი ექიმისაგან გაიგონებთ: "რა საჭიროა სასმენი აპარატი, ნუ გავაზარმაცებთ ყურს". ეს არასწორი მიდგომაა, მეტიც, მე ზოგადად ვერიდები კატეგორიულ და მკვახე გამოთქმებს, მაგრამ ამ შემთხვევაში თამამად განვაცხადებ, რომ ეს დანაშაულიცაა! რას ნიშნავს "ნუ გავაზარმაცებთ ყურს"? პირიქით, სწორედ რომ მაქსიმალურად უნდა დავტვირთოთ, რათა არ გაზარმაცდნენ.


- ტოტალური სიყრუე თუ არსებობს, როდესაც ადამიანს არანაირი სიხშირის ბგერები არ ესმის?


- რა თქმა უნდა, არსებობს, მაგრამ ძალზე იშვიათია. ჩვეულებრივ, ამა თუ იმ სიხშირის ბგერების აღქმას ყური ყოველთვის ინარჩუნებს. როცა სამეტყველო სიხშირეები გამოვარდნილია, აუცილებლად უნდა გამოვიყენოთ სასმენი აპარატი. საერთოდ, რეცეპტორული აპარატის დაზიანებისას, როგორც წესი, იწყება განსაკუთრებულად მაღალი სიხშირის ბგერების გამოვარდნა, ეს კი უკვე იმის მინიშნებაა, რომ მდგომარეობა მკურნალობასა და პროფილაქტიკურ ღონისძიებებს მოითხოვს, რათა სმენა უფრო მეტად არ დაქვეითდეს. მოგვიანებით, პათოლოგიური პროცესი სამეტყველო ბგერებზე გადადის, ანუ სამეტყველო სიხშირეების გამოვარდნაც ხდება. მაღალი სიხშირის ბგერების გამოვარდნას ყურადღებას არ აქცევენ. განგაშის ზარი მაშინ რეკს, როდესაც სამეტყველო ბგერები აღარ ესმით, ამ დროს კი ხშირად უკვე დაგვიანებულია. ამიტომაც სმენის ორგანოს დროულად უნდა მივაქციოთ ყურადღება.


- რას გულისხმობს სმენის დაქვეითების კორექცია? რა პრინციპს ეფუძნება სასმენი აპარატების გამოყენება?


- არ ვიცი, ვინ შემოიტანა სათვალე საქართველოში, მაგრამ მეამაყება, რომ სასმენი აპარატები ჩვენ შემოვიტანეთ და დავნერგეთ. არსებობს ასეთი ფირმა - "კინტი". ეს გვარია ძალიან ცნობილი ადამიანისა - მარტინ კინტისა, რომლის წყალობითაც ჩვენი ქვეყნისთვის ასეთი დიდი საქმე გაკეთდა. მე წლების განმავლობაში ვიმუშავე გერმანიაში. 120 საერთაშორისო ნაშრომი მაქვს შესრულებული გერმანელებთან ერთად, რასაც ისინი განსაკუთრებულად აფასებენ. არ მინდა ტრაბახში ჩამომართვათ, მაგრამ ამ და სხვა ფაქტორებმა განაპირობა, რომ მარტინ კინტმა განაცხადა: მე მაქვს ამბიცია, შევიტანო საქართველოში სასმენი აპარატები, არა იმისთვის, რომ აქედან შემოსავალი მივიღო, არამედ იმისთვის, რომ ამ ქვეყნის მოსახლეობას რეალურად დავეხმაროო. არ დაიჯერებთ და სასმენი აპარატები ჩვენთან 4-5-ჯერ უფრო იაფია, ვიდრე თვით გერმანიაში. დაუჯერებელია, მაგრამ ფაქტია. მარტინ კინტმა არ გატეხა სიტყვა და ჩვენთან აპარატებს იმ ფასად აგზავნის, რაც თავად უჯდება. მე დიდი მადლობელი ვარ მამა-შვილი კინტებისა (ამ საქმიანობაშია ჩართული მარტინის შვილი, ალექსანდრე კინტიც). აქვე დიდი გულისტკივილით აღვნიშნავ, რომ ამ უდიდესი საქმის შემდეგ ჩვენთან, პრესაში, ასეთი რამ დაიბეჭდა - მამა-შვილმა ქევანიშვილებმა (ჩემი შვილიც ამ საქმეშია ჩართული) სასმენი აპარატებით ფული გააკეთესო, და საერთოდ, რა საჭიროა ეს აპარატები, ხელები ხომ გვაქვს და კომუნიკაციაც ხელებით როგორმე მოხერხდებაო. კიდევ ერთხელ ვამბობ, ეს ძალიან გულსატკენია. ბევრისათვის მართალაც დაუჯერებელია, რომ ამერიკაში 2000 ევროდ ღირებული სასმენი აპარატები საქართველოში 300-400 დოლარი ღირს. ერთმა ადამიანმა ისიც კი მკითხა, ჩვენთან უხარისხო პროდუქცია ხომ არ შემოდის, ასე იაფი რომ ღირსო? ვერ წარმოუდგენიათ, რომ მრავალწლიან ურთიერთობას, მეგობრულ კავშირებს მეცნიერებს შორის, ორ ქვეყანას შორის ხშირად ასეთი სასიკეთო ნაბიჯები მოჰყვება. გერმანელებთან ჩვენ დიდი მეგობრობა და მრავალწლიანი მუშაობა გვაკავშირებს. ჯერ კიდევ გერმანიის დემოკრატიული რესპუბლიკიდან ჩამოდიოდნენ საქართველოში მეცნიერები. მოგეხსენებათ, მათ საბჭოთა კავშირის გარდა სხვაგან არ შეეძლოთ წასვლა. ჩვენ ერთად ვმუშაობდით ძალზე საინტერესო საკითხებზე, მით უფრო, რომ ბატონი ხეჩინაშვილი საუკეთესო აპარატურით გვამარაგებდა. გამოწვეული პოტენციალების ჩამწერი კომპიუტერული აპარატი იმ პერიოდში საქართველოში უკვე გვქონდა. ამ ურთიერთობებმა, უდიდესმა მეგობრობამ და პატივისცემამ განაპირობა ეს სიკეთე... ხოლო ის, რომ აპარატები საჭირო არ არის, ინფორმაციის გაცვლისათვის ხელებიც აქვს ადამიანს და საკმარისიაო - სრული უმეცრება და სიბრიყვეა.



თარიღი : 16-06-2014
ნათიკო
გამარჯობათ.მაინტერესებს როცა 2 თვის ჩვილს მეოთხე ხარისხის სმენაჩლუნგობას უსმევენ დიაგნოზად და შემდგომ ნერვოპათოლოგი 6 თვემდე დაკვირვრბას მირჩევს და ბავშვს ამ დროის მანძილზე ჩურჩულზე ვაღვიძებ,ან კრთება ან თვალებს ამოძრავებს ან ხელებს და თან მძინარე.რა შეიძლება მითხრათ.ბავშვი ღუღუნებს და აქტიურია.აქვს ღრმა ძილი.უკვე 3 თვეა ვაკვირდები და ჩურჩულიც კი რეაქციას აძლევს მძინარეს როდესაც სრული სიწყნარეა.არამარტო ჩურჩული.ტელეფონის ზარზეც გაუღვიძია და ხმოვან ზღაპრის წიგნზეც.ხშირად არ კრთება.ხან ფეხის ხმაზე გაუღვიძია ხანაც კარის დახურვაზე.აუდიომეტრია 6 თვის ასაკში უნდა გავუკეთოთ თუმცა მანამდე სკრინინგი უნდა ჩაუტარდეს.
კომენტარი
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას,სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.
ცურვა განსაკუთრებით სასარგებლო და მნიშვნელოვანია მათთვის, ვისთვისაც სპორტის ძალისმიერი სახეობები უკუნაჩვენებია.
ექიმების რჩევით, კონდენციონერების გამოყენება მინიმუმამდე უნდა შევზღუდოთ. საქმე ეხება საშიშ ბაქტერიას - ლეგიონელას.
კომპანიის წამყვანი თანამშრომელი სამსახურში არ გამოცხადდა, თანაც არავისთვის დაურეკავს, რომ გაეფრთხილებინა კომპანიის ხელმძღვანელი.
ამ კატეგორიის სხვა სტატიები
მოკლე აღწერა

ქრონიკული ტონზილიტის დროს ზიანდება არა მარტო ხახის ლორწოვანი გარსი, დაავადების ხანგრძლივი მიმდინარეობისას შეიძლება შეიქმნას მეტად მძიმე, ჯანმრთელობისთვის საზიანო მდგომარეობა. თირკმლები, გული, სახსრები - ეს “სამიზნე ორგანოების” არასრული ჩამონათვალია. თავად დაავადების გამწვავების შესახებ არაფერს ვამბობთ - ანგინა, ნუშურების მიმდებარე ქსოვილის აბსცესი, თანმხლები 400C ტემპერატურით და ჭამა-სმის შეუძლებლობა. ამიტომ პრობლემა რადიკალურად უნდა აღიკვეთოს.


რა უნდა გავაკეთოთ?

20 წლის შემდეგ ნუშურა ჯირკვლები თავდაცვით ფუნქციას ვეღარ ასრულებენ, ამიტომ მათზე “უარის თქმა” გაცილებით ადვილია. თუ შესაძლებლობა გაქვთ, რა თქმა უნდა, შეიძლება კვირაში ერთხელ ან რამდენჯერმე იაროთ პოლიკლინიკაში და გამოირეცხოთ ნუშურა ჯირკვლები, მოიცილოთ დეტრიტის ნალექი (საკვების ნაწილაკები, მიკრობული მასები და სხვა). თუმცა, როგორც პრაქტიკა გვაჩვენებს, ქრონიკულ ინფექციასთან საბრძოლველად არ არსებობს ოპერაციაზე უკეთესი მეთოდი.


ოპერაცია “გლანდებზე”

ოპერაცია ტონზილექტომია (“გლანდების” ამოკვეთა) - შესასრულებლად ადვილია. მისი გაკეთება შეიძლება ადგილობრივი ანესთეზიითაც და ზოგადი ნარკოზითაც. თუ პაციენტი თანახმაა და სისხლის არ ეშინია, მაშინ ოპერაციის ჩატარება მიზანშეწონილია ადგილობრივი ანესთეზიით. ამ დროს პროცედურა ძირითადად ხუთ წუთში სრულდება. არსებობს რთული სიტუაციებიც - ქრონიკულ ანთებას ნუშურა ჯირკვლების მიმდებარე ქსოვილებში ნაწიბურებისა და შეხორცებების განვითარება მოსდევს და ნუშურების მოცილება შესაბამისი ადგილებიდან ძნელდება და ხანგრძლივდება. როგორც წესი, თუ სისხლდენა არ ვითარდება და შეხორცების პროცესი გეგმის მიხედვით, ბუნებრივად მიმდინარეობს, მაშინ პაციენტს ოპერაციიდან 3-5 დღეში სახლში უშვებენ.


ტონზილექტომიის მეთოდები, ანუ რომელი ავირჩიოთ?

სადღეისოდ ამ ოპერაციას რამდენიმე მეთოდით აკეთებენ. კლასიკური მეთოდის გარდა ქსოვილებზე ლაზერის, ულტრაბგერის, თხიერი აზოტისა და პლაზმის ზემოქმედება გამოიყენება.

1. კლასიკა - ოპერაცია მიმდინარეობს ადგილობრივი ანესთეზიით ან ზოგადი ნარკოზით, სკალპელის, მაკრატლისა და მარყუჟის გამოყენებით. ამ დროს მთლიანად ამოიჭრება და ამოიგლიჯება ნუშურა ჯირკვლები. სისხლდენა ჩერდება ელექტროკოაგულაციით. მეთოდი რადიკალურია და ინფექციის წყაროს სამუდამოდ მოგაშორებთ. იდეალურ ვარიანტში შეხორცება ზომიერი ტკივილის სინდრომით მიმდინარეობს, ქრონიკული ტონზილიტის რეციდივი არ ვითარდება. თუმცა ლიმფოიდური წარმონაქმნების სრული ამოკვეთისას ქვეითდება ადგილობრივი უჯრედული და ჰუმორული იმუნიტეტი და გზა ეხსნება ლარინგიტს (ხორხის ლორწოვანის ანთება), ფარინგიტს (ხახის ლორწოვანის ანთება) და ბრონქიტს (ბრონქების ანთება). ასევე იმატებს სასუნთქი გზების ალერგიული პათოლოგიების განვითარების რისკი.

2. უფრო დახვეწილი კლასიკური გზა - ეს წუთში 6 ათასი ბრუნის მქონე მიკროდებრიდერით ჯირკვლების ამოკვეთაა. ამ ვარიაციას მარტივი ოპერაციული მიდგომის ყველა დადებითი და უარყოფითი მხარე აქვს. ტკივილი ოპერაციის დროს უფრო ნაკლებია, მაგრამ თავად ოპერაციას - მეტი დრო და შესაბამისად, გაუტკივარებასაც წამლის უფრო მეტი დოზა სჭირდება.

3. ლაზერული ტონზილექტომია. ეს პროცედურა ადგილობრივი ანესთეზიით დაახლოებით ნახევარ საათს გრძელდება. ლაზერი ქსოვილებსაც აშორებს და სისხლძარღვებსაც “აწებებს”, რაც სისხლის დანაკარგს ამცირებს. ამ დროს არსებობს ლორწოვანზე დამწვრობის განვითარების რისკი, ეს კი შეხორცებას ახანგრძლივებს. ამ მეთოდით ოპერაციისას გამოიყენება სხვადასხვა სახის ლაზერი: ინფრაწითელი, ბოჭკოვან-ოპტიკური და სხვა. არსებობს ორგანოდამზოგველი ლაზერული ოპერაციაც - აბლაცია (ნუშურა ჯირკვლების ნაწილობრივი ამოკვეთა), რომლის დროსაც შორდება ჯირკვლების მხოლოდ ზედა ნაწილები ან ინფექციით დაზიანებული უბნები.

4. ელექტროკოაგულაცია. ამ მეთოდის გამოყენებისას ყოველთვის არ ხერხდება ჯირკვლების ერთი სეანსით მოწვა საკმარის სიღრმემდე. ეს კი პრობლემის სრულად აღმოსაფხვრელად არ კმარა. არასწორად შერჩეული სიმძლავრის შემთხვევაში შეიძლება დამწვრობა განვითარდეს, შესაბამისად, ჭრილობის შეხორცების დროც ხანგრძლივდება. დადებითი მხარე ის არის, რომ, ლიმფოიდური ქსოვილის მოცილება და სისხლძარღვების მოწვა ერთი აპარატით ხდება.

5. თხევადპლაზმური მეთოდი (კობლატორი). ოპერაცია ზოგადი ინტუბაციური ნარკოზით მიმდინარეობს. ოპერაციის ხარისხი ქირურგის გამოცდილებაზეა დამოკიდებული. მაღალკვალიფიციური ექიმის მიერ ჩატარებული ოპერაციისას სისხლდენა პრაქტიკულად არ ვითარდება, ჯირკვლები კი ფაქიზად იკვეთება. ამ დროს, კლასიკურ ვარიანტთან შედარებით, ოპერაციის შემდგომი ტკივილი გაცილებით ნაკლებია. მეთოდის არსი - მიმართული მაგნიტური ველით პლაზმის ჩამოყალიბებაა. ამისთვის შეირჩევა დენის ისეთი ძაბვა, რომელიც ქსოვილს 45-60 გრადუსამდე აცხელებს, რაც ცილებს ნახშირორჟანგამდე, წყლამდე და დაბალმოლეკულურ აზოტშემცველ პროდუქტებამდე შლის.

6. კრიოდესტრუქცია თხევადი აზოტის დახმარებით ყინავს ლიმფოიდურ ქსოვილს, რომლის შემდეგაც ქსოვილი კვდომას იწყებს და თავისით მოვარდება (შორდება). რადგან გაყინვა ტკივილის რეცეპტორების ბლოკირებას იწვევს, მანიპულაცია ადგილობრივი ანესთეზიით ტარდება. თუმცა მტკივნეულია ოპერაციისშემდგომი პერიოდი. შედეგი ყოველთვის რადიკალური არ არის, ზოგჯერ საჭიროა განმეორებითი პროცედურები. მოყინული ქსოვილები ორგანიზმს ნელ-ნელა სცილდება, ამიტომ ოპერაციის შემდეგ ხახის ლორწოვანს გულმოდგინე ანტისეპტიკური მოვლა სჭირდება.

7. ულტრაბგერითი სკალპელი. 20 ათას კჰც-ზე მეტი სიხშირეები ქსოვილებს ოთხმოც გრადუს ცელსიუსამდე აცხელებს. შედეგად ულტრაბგერითი გამომსხივებელი სკალპელის მსგავსად მუშაობს. მეთოდი ეფექტურია. მისი საშუალებით რადიკალური ტონზილექტომიის ჩატარება შეიძლება. თუმცა არსებობს ლორწოვანის დამწვრობის განვითარების რისკი.

ოპერაციის მეთოდის შერჩევა მაინც ექიმის პრეროგატივაა, რადგან სწორედ ის არის პასუხისმგებელი მკურნალობის მიმდინარეობასა და შედეგზე და მხოლოდ მას შეუძლია სრულფასოვნად შეაფასოს არა მარტო პაციენტის მდგომარეობა, არამედ მომავალი ოპერაციის მოცულობაც.

ნუშურა ჯირკვლების ამოკვეთის წინააღმდეგჩვენებები:

1. აბსოლუტური (კატეგორიულად არ შეიძლება ოპერაციის გაკეთება):

  • სიმსივნური დაავადებები;
  • სისხლისა და ძვლის ტვინის დაავადებები, რომლებიც სისხლის შედედების სისტემის დაზიანებასთან არის დაკავშირებული;
  • პირველი ტიპის შაქრიანი დიაბეტი;
  • მეორე ტიპის შაქრიანი დიაბეტის დეკომპენსაცია;
  • გულსისხლძარღვთა პათოლოგიების დეკომპენსაცია;
  • დეკომპენსირებული ფილტვისმიერი დაავადებები;
  • აქტიური ტუბერკულოზი.

2. დროებითი წინააღმდეგჩვენებები (მიზეზის მოცილების შემდეგ შესაძლებელია ტონზილექტომიის ჩატარება):

  • მწვავე ინფექციები (რესპირატორული, ჰაიმორიტი, რინიტი, ფარინგიტი, ლარინგიტი, ბრონქიტი);
  • ქრონიკული დაავადებების გამწვავება;
  • ორსულობა.


ნუშურა ჯირკვლების ამოკვეთის შედეგები

ტონზილექტომიის შესაძლო გართულებების გარდა, რომლებსაც მიეკუთვნება: სისხლდენა, ინფექცია, ქსოვილების დამწვრობა, შესაძლოა სხვა შორეული შედეგების განვითარება, კერძოდ:

  • ადგილობრივი უჯრედული იმუნიტეტის დაქვეითება;
  • ჰუმორული იმუნური პასუხის შესუსტება;
  • სასუნთქი გზების ინფექციები: ფარინგიტი, ლარინგიტი, ტრაქეიტი, ბრონქიტი;
  • ალერგიული ბრონქოსპაზმები (ბრონქული ასთმა), მათ შორის, ინფექციურ-ალერგიული ბუნების.


როგორ მოვიქცეთ ტონზილექტომიის შემდეგ?

ამ დროს აუცილებელია გარკვეული რეჟიმის დაცვა, დაახლოებით ერთი კვირის განმავლობაში სახლში ყოფნა და ყელის მიდამოში ანტისეპტიკური ხსნარების გამოვლება. უმრავლეს შემთხვევაში, შეუძლოდ ყოფნის, სწრაფად დაღლის შეგრძნებები, ანგინები და ჯირკვლების მიმდებარე ადგილების დაავადებები უკვალოდ ქრება.


ხმის ფუნქციურ მოშლას ფონასთენია ეწოდება. ის შესაძლოა ხმის ჩახლეჩის (დისფონია) ან ხმის დაკარგვის (აფონია) სახით გამოვლინდეს. ფონასთენია პროფესიული დაავადებაა. ის ძირითადად მომღერლებს, პედაგოგებს, მსახიობებს და სხვა ისეთი პროფესიის ადამიანებს აღენიშნება, რომელთაც სამეტყველო აპარატის გადაძაბვა უწევთ. ხმის ფუნქცია, საზოგადოდ, სახმო აპარატის ჯანმრთელობაზეა დამოკიდებული.

ნუშურები, იგივე ტონზილები, ხახის ცხვირის ნაწილის ლორწოვანის სისქეში, მის უკანა კედელზე და ლულის ხვრელის ირგვლივ არსებული კარგად განვითარებული ლიმფოიდური ქსოვილია. ხალხში ფართოდ გავრცელებული ტერმინი “გლანდები” ნუშურების ლათინური სახელწოდებიდან - “გლანდულადან” მომდინარეობს. “გლანდულა” ჯირკვალს ნიშნავს, თუმცა ნუშურების მიმართ ეს სახელწოდება რამდენადმე არასწორია, რადგანაც ტონზილები არც სტრუქტურულად და არც ფუნქციურად ჯირკვლები არ არის (ისინი არც ენდოკრინული ანუ შინაგანი სეკრეციის და არც ეგზოკრინული - სპეციალური მილის - სადინარის დახმარებით გარეთ გამომყოფი ჯირკვლები არაა). ნუშურები იმუნური სისტემის შემადგენელი უმნიშვნელოვანესი ნაწილი - ლიმფოიდური ქსოვილია. მათ დამცველობითი და გარკვეულწილად სისხლმბადი ფუნქციაც აქვთ (მათში ლიმფოციტები წარმოიქმნება).

ყელის ტკივილი ყველასთვის კარგად ნაცნობი შეგრძნებაა, ის ძალზე მომაბეზრებელია, როდესაც ქრონიკული ხდება და საგრძნობლად აუარესებს ადამიანის ცხოვრების ხარისხს.

მუდმივი დისკომფორტის შეგრძნება, ყლაპვის გაძნელება, ხორხის შეშუპება, სხეულის ტემპერატურის მატება, მტკივნეული შეგრძნებანი, სუნთქვის გაძნელებაც კი – ამ სიმპტომებს ერთმანეთისგან სრულიად განსხვავებული მიზეზები აქვს.

თანამედროვე ხედვა

ტინიტუსი ლათინური წარმოშობის სიტყვაა. ტინნირე პირდაპირი მნიშვნელობით ზანზალაკების წკრიალს, რეკას ნიშნავს. ტერმინით “ტინიტუსი” მსოფლიოში ხმაურის სუბიექტურ აღქმას აღნიშნავენ. თუმცა ტინიტუსი თავისი არსით უფრო მასშტაბურია, გულისხმობს არა მხოლოდ ხმაურს, რეკას ყურებსა თუ თავში, არამედ იმ ფსიქიკურ, ემოციურ და სოციალურ პრობლემათა ერთობლიობას, რომელიც ხმაურის მუდმივ აღქმასთან არის დაკავშირებული და რეალურად მისი შედეგია.

კონკრეტული მიზეზი, რის გამოც ადენოიდები ვითარდება, უფრო სწორად, ცხვირ-ხახაში არსებული ლიმფოიდური ქსოვილი განიცდის ჰიპერპლაზიას (გადიდებას სტრუქტურული ელემენტების ინტენსიური გამრავლების გამო), ჯერ კიდევ უცნობია. სამაგიეროდ, კარგად არის ცნობილი ის გართულებები, რომლებიც არანამკურნალებ ადენოიდებს ახასიათებს. ბევრი უფრთხის მათ ამოკვეთას (ადენოტომიას). ამას თავისი საფუძველი აქვს. ასეა თუ ისე, ადენოიდების პრობლემა ფართოდ გავრცელებული და აქტუალურია. სწორედ ამ აქტუალურ საკითხზე გვესაუბრება შპს “მედისონის”, ქირურგიის ეროვნული ცენტრისა და თბილისის ონკოდისპანსერის ექიმი ოტორინოლარინგოლოგი გიორგი ბოლქვაძე.

20 ივლისი 2017
დილით უზმოზე, ჭამამდე 30-40 წუთით ადრე, სასარგებლოა 1 ჭიქა წყლის მიღება. ეს პროცედურა მოამზადებს კუჭ-ნაწლავს შემდგომი დატვირთვისთვის, დააქვეითებს მადას, ორგანიზმიდან გამოდევნის ტოქსინებს და შლაკებს. დღის განმავლობაში სასურველია დალიოთ არანაკლებ 2 ლიტრი წყალი.
29 ივნისი 2017
კანადელი მეცნიერების განმარტებით, სხვადასხვა მუსიკალურ ინსტრუმენტზე დაკვრა ასაკოვან ადამიანებთან ნეიროდეგენერაციული პროცესების განვითარებას აფერხებს.
ადამიანთა უმრავლესობას, გამოსასვლელ დღეებში სადილობამდე უყვარს ლოგინში კოტრიალი, რის შემდეგაც თავს დამძიმებულად და მოდუნებულად გრძნობს.
ამერიკელი მკვლევარები ამტკიცებენ, რომ ლუდი და არაქისი ვარჯიშის შემდეგ ადამიანს აღდგენაში ეხმარება. ინტენსიურმა ფიზიკურმა დატვირთვამ შეიძლება გამოიწვიოს ჯანმრთელობისთვის საშიში გაუწყლოება. ლუდისა და არაქისის მიღება ხელს უწყობს სითხის მარაგის შევსებას.
ამერიკელი ფსიქოლოგების განცხადებით, ინტერნეტის გავრცელებამ განსაკუთრებულად გაზარდა აზარტული თამაშების მიმართ მიდრეკილი ადამიანებს რიცხვი. საგანგაშოა ის, რომ ამ ადამიანებს უფრო მეტად აქვთ გამოხატული ემოციური დარღვევები