ყირიმ-კონგოს დაავადებით ორი ადამიანი გარდაიცვალა
დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელის, ხათუნა ზახაშვილის ცნობით, გარდაცვლილთაგან ორივე ქალია, რომელთა ასაკი 34 და 77 წელია. მიმდინარე წელს აღნიშნული დაავადების სულ 5 შემთხვევაა რეგისტრირებული.
"2014 წელს ყირიმ-კონგოს 5 შემთხვევა დაფიქსირდა. ეს დაავადება საკმაოდ მძიმეა, რომელიც ტკიპებს გადააქვთ. ჯერჯერობით შემთხვევები შიდა ქართლსა და სამცხე-ჯავახეთში გვხვდება. ჩვენთვის ცნობილია, რომ თბილისშიც ენდემური კერაა, რადგან დედაქალაქში სხვა წლებშიც გვქონია ყირიმ-კონგოს შემთხვევები. ეს დაავადება ძირითადად ჩნდება დათბობის მერე, როდესაც ტკიპები იწყებენ აქტივობას", - აღნიშნა ზახაშვილმა.
რა არის ყირიმ-კონგოს დაავადება!
ყირიმ-კონგოს ცხელება მძიმე ვირუსული ინფექციაა, რომელიც ადამიანებზე ტკიპების ნაკბენით ვრცელდება; ყირიმ-კონგოს ვირუსი ეპიდაფეთქებებით ხასიათდება. ვირუსული ინფექციის ძირითადი გადამტანები მინდვრის თაგვები და ტკიპები არიან. ტკიპამ ჯერ უნდა უკბინოს დაავადებულ მღრღნელს, რომელიც ინფექციის ძირითადი რეზერვუარია და შემდეგ - ადამიანს. დამახასიათებელია მაღალი ტემპერატურა, ჩნდება სისხლჩაქცევები კანზე, კანქვეშ, ნაკბენის მიდამოებში და ვითარდება სისხლდენა შინაგანი ორგანოებიდან. ადამიანიდან ადამიანზე ეს ვირუსი არ გადადის. დაავადების ინკუბაციური პერიოდი 2-7 დღეა. სამწუხაროდ, ეს საკმაოდ მძიმე ვირუსული დაავადებაა და მაღალი ლეტალობით ხასიათდება. დაავადებულთა დაახლოებით 40% იღუპება. ხშირ შემთხვევაში მკურნალობას არ ექვემდებარება.