შეკრულობას ფიზიკური აქტივობით აიცილებთ
მოძრაობა და მოძრაობა, ფეხით სიარული და აქტივობა წამყვანი კომპონენტია შეკრულობით შეწუხებულთა სამკურნალო კომპლექსში. აღნიშნული პრობლემის მქონე ადამიანებს, როგორც წესი, მუცლის კუნთების დაჭიმულობა და უსიამოვნო შეგრძნებები აწუხებთ ჭიპის და მის ქვემოთ არსებულ არეში. აქედან გამომდინარე, აუცილებელია თვითმასაჟის წესად დანერგვა და მისი რეგულარულად განხორციელება დილაობით, უზმოზე.
ეს მარტივი და ადვილად შესასრულებელი პროცედურაა - სამი თითით (საჩვენებელი, შუა და არათითით) უნდა მსუბუქად დააწვეთ მუცლის კედელს 3 წუთის განმავლობაში. ზეწოლა კანზე ქვედა და ამავე დროს ცენტრისკენული მიმართულებით უნდა განახორციელოთ 5-6 ჯერ გარკვეული პაუზებით; ამის შემდეგ ერთი ჭიქა თბილი წყალი უნდა დალიოთ და ისე წამოდგეთ.
კარგ ეფექტს იძლევა მუცლის არეზე 5 წუთიანი წრიული მასაჟი თბილ აბაზანაში (აბაზანა უმჯობესია მჯდომარე პოზაში დღე გამოშვებით მიიღოთ). ამავე მიზნით დღე გამოშვებით 20 წუთიან წიწვიან აბაზანებსაც იყენებენ.
აუცილებლად ივარჯიშეთ:
1) დაწექით ზურგზე, ხელები სხეულის პარალელურად განათავსეთ, ფეხები მოხარეთ მუხლის სახსარში. ჩასუნთქვაზე ორივე ფეხი მაქსიმალურად გადახარეთ ჯერ ერთ, შემდეგ კი მეორე მხარეს ისე, რომ მუხლებით იატაკს შეეხოთ. ამოსუნთქვაზე დაუბრუნდით საწყის პოზიციას. ვარჯიში თითოეულ მხარეს საშუალო ტემპში 5-6 ჯერ შეასრულეთ.
2) დადექით ოთხზე (ანუ ოთხივე კიდურს დაეყრდენით). ჩასუნთქვაზე მონაცვლეობით გამართეთ ჯერ ერთი, შემდეგ მეორე ფეხი (ანუ ფეხები ასწიეთ უკან და ზემოთ), ამოსუნთქვაზე დაუბრუნდით საწყის პოზიციას. აღნიშნული ვარჯიში თითოეული ფეხით საშუალო ტემპში 5-6 ჯერ შეასრულეთ.
თინათინ გოცაძე