რუბრიკები
ოჯახის მკურნალი
კითხვა-პასუხი
დედის ხელით

მომავალმა დედებმა კარგად იციან, რომ პატარას დაბადებამდე უნდა მოუმზადონ "მზითევი". ამ მზითევისთვის ბევრი რამ შეგიძლიათ საკუთარი ხელით შექმნათ. ცრურწმენა, თითქოს ბავშვისთვის ტანსაცმლისა და სხვა აუცილებელი ნივთების მომზადება დაბადებამდე არ შეიძლება, კარგა ხანია დავიწყებას მიეცა. თანამედროვე დედები ცდილობენ, ყველაფერი წინასწარ
მოიმარაგონ. სასიამოვნო განცდაა, როდესაც პატარას ტანსაცმელს საკუთარი გემოვნებით არჩევ და ორმაგად სასიამოვნოა, როდესაც შეგიძლია, შვილი შენივე ხელით შეკერილი, მოქსოვილი თუ მოქარგული სამოსით გაახარო.

ტანსაცმელი
ბავშვის გარდერობის ყველაზე მომხიბლავი ნივთი ფაჩუჩებია. სწორედ მათი ქსოვის შესწავლა სურთ მომავალ დედებს. გამოცდილი მქსოველის ხელმძღვანელობით ლამაზი ფაჩუჩების შექმნა სულაც არ არის ძნელი, განსაკუთრებით მაშინ, როცა ქსოვის ელემენტარული ჩვევები გაქვთ. თუ მაინც შიშობთ, შეგიძლიათ, ქსოვა უფრო მარტივი ნივთებით, მაგალითად, პლედით დაიწყოთ. მაქსიმალური კომფორტისთვის დაგჭირებათ სულ პატარა - დაახლოებით 50X80სმ ზომის - პლედი. მის მოსაქსოვად დაახლოებით იმდენივე დრო და ძალისხმევაა საჭირო, რამდენიც ღაზლის მოსაქსოვად. პლედი მთლიანიც შეიძლება იყოს და პატარა, გეომეტრიული ფორმის დამოუკიდებელი ნაწილებისგან შეკერილიც. თუ კერვა უფრო მეტად გეხერხებათ, ვიდრე ქსოვა, შეგიძლიათ ფერადი ნაკუწებისგან ლამაზი საბანი შეკეროთ. თუ გრძნობთ, რომ მთელი საბნისპირის შესაკოწიწებლად მოთმინება არ გეყოფათ, შეგიძლიათ, პატარა ნაწილი შეკეროთ და შესატყვისი ფერის საბანს დააკეროთ. თუ არც ქსოვა გიტაცებთ და არც კერვა, გირჩევთ, ქარგვასა და აპლიკაციაში სცადოთ ბედი. გული, ყვავილი, დათვის ბელი ნებისმიერ ნივთს გაალამაზებს.

 

ინტერიერი
ხელსაქმის მეორე მიმართულება ინტერიერის გალამაზებაა. განსაზღვრული ხნის შემდეგ ბავშვი აუცილებლად დააფასებს ინტერიერის სილამაზეს. თქვენთვისაც უფრო სასიამოვნო იქნება მყუდრო და გემოვნებით მოწყობილ ოთახში ყოფნა. ყველაზე ეფექტური და მარტივი ტექნიკა, რომლის მეშვეობითაც შეგიძლიათ გაალამაზოთ ბავშვის ავეჯი, ყუთები და ჩარჩოები, ხელით ხატვის იმიტაციაა. შეგიძლიათ, გამოჭრათ ლამაზი ნახატი ან ფიგურა (უმჯობესია, ქაღალდი თხელი იყოს) და ავეჯის ზედაპირზე ჩვეულებრივი ხის წებოთი დააწებოთ. მომდევნო ეტაპი ნახატის ლაქით დაფარვაა. უმჯობესია, ეს სამუშაო ოჯახის წევრებმა მაშინ შეასრულონ, როცა მომავალი დედა სასეირნოდ წავა - თანამედროვე აკრილის ლაქები საკმაოდ სწრაფად შრება და სუნსაც არ ტოვებს. კერვის მოყვარულებსაც შეუძლიათ, ეფექტურად გამოიყენონ თავისი ნიჭი ინტერიერის გასალამაზებლად. მაგალითად, შექმნან ჯიბეებიანი ხალიჩა, რომელიც ლამაზიც არის და პრაქტიკულიც: აიღეთ უბრალო ტილოს ნაჭერი, კედლებზე ლამაზი არშია შემოავლეთ და ჯიბეები დააკერეთ.

ნაჭრის ზომა, ფერი, ჯიბეების ფორმა და რაოდენობა შეგიძლიათ სურვილისამებრ შეარჩიოთ. შემდეგ ეს ჯიბეებიანი ქსოვილი საწოლის კიდეებზე დაამაგრეთ ან კედელზე დაკიდეთ, მის ჯიბეებში კი საჭირო წვრილმანები ჩააწყვეთ - მათი ძებნაც აღარ დაგჭირდებათ. როცა პატარა წამოიზრდება, შეეძლება, თქვენი ქმნილება ფლომასტერებისა და ფანქრების შესანახად გამოიყენოს. კიდევ ერთი რამ, რაც აუცილებლად უნდა მოამზადოთ, ბავშვის სიმაღლის საზომია. სიცოცხლის პირველი ორი წლის განმავლობაში ბავშვი ინტენსიურად იზრდება. ამ პერიოდში დედას იმდენი საზრუნავი აქვს, რომ მსგავსი მოწყობილობის შესაქმნელად ნამდვილად ვერ მოიცლის, ამიტომ ჯობს, სიმაღლის საზომი პატარას დაბადებამდე მოამზადოს. ციფრების გასწვრივ ამოქარგული ვარსკვლავი, დათუნია ან ბურთი სიმაღლის გაზომვას თქვენი პატარას ერთ-ერთ უსაყვარლეს გართობად აქცევს. შემდეგ კი შეგიძლიათ, ეს საზომი შვილიშვილებს შეუნახოთ.

 

სათამაშოები
სათამაშოების ქსოვა და კერვა საკმაოდ მხიარული და სასიამოვნო საქმიანობაა. როგორც ფსიქოლოგები ამტკიცებენ, ბავშვის განვითარებისთვის თვითნაკეთი სათამაშოები განსაკუთრებით სასარგებლოა. თანაც მათ დედის ხელების სითბო აქვთ შერჩენილი და ბუნებრივი ქსოვილებისგან არიან დამზადებულნი.
ალბათ უმჯობესია, პირველ რიგში მოძრავი სათამაშო დაამზადოთ. ჯერ ქაღალდის თარგი გამოჭერით დათუნიასთვის, კურდღლისთვის, ღრუბლისთვის (გაითვალისწინეთ: ამ სათამაშოების ზომა 8-10 სანტიმეტრს არ უნდა აღემატებოდეს და დეტალებით არ უნდა იყოს გადატვირთული). გამოჭერით ფიგურები, ნაჭრები უკუღმა დაადეთ ერთმანეთს, პირი გაუკერეთ, შემდეგ გადმოაბრუნეთ და ბამბით გამოტენეთ. როცა რამდენიმე სათამაშოს შეკერავთ, გააერთიანეთ - წვრილი თოკებით ერთ რგოლზე დაკიდეთ, ხოლო რგოლი საწოლის ზემოთ დაამაგრეთ. სათამაშო უბრალო შეხების დროსაც კი ამოძრავდება და უდავოდ მიიპყრობს პატარას ყურადღებას.

ძაფისთმიანი ნაჭრის თოჯინაც თქვენი შვილის საყვარელ სათამაშოდ იქცევა. პაწაწა მას ჯერ დაათვალიერებს, შემდეგ მოფერებასაც ისწავლის, როცა წამოიზრდება, საწოლშიც ჩაიწვენს...
სათამაშო წიგნის შესაქმნელად სხვადასხვა ფერის სქელ ნაჭრებზე სხვა ფერის ნაჭრისგან გამოჭრილი ფიგურები დააწებეთ ან დააკერეთ. ეცადეთ, განსხვავებული ფაქტურის ქსოვილები შეარჩიოთ. მათი შეხებისას პატარას ტაქტილური შეგრძნება და წვრილი მოტორიკა განუვითარდება. პატარას აუცილებლად განაცვიფრებთ "ფანჯრებიანი" წიგნით - მის ერთ "ფურცელზე" არსებული ფანჯარა იღება და იქიდან მეორე ფურცელზე "მობინადრე" დათუნია ან კურდღელი ჩანს. შეგიძლიათ, საამისოდ მზა აპლიკაციაც გამოიყენოთ.

 

საჩუქარი
არსებობს თვითნაკეთი ნივთები, რომელთა შექმნაც საკუთარი თავისთვის აზრადაც არ მოგივათ, მაგრამ ძალიან გესიამოვნებათ, თუ ვინმე მსგავს საჩუქარს მოგართმევთ. მაგალითად, ძალიან ლამაზია მოქარგული ღია ბარათი. ის საკმაოდ ეფექტურია და სულაც არ არის ძნელი დასამზადებელი. ქაღალდი ორად გაკეცეთ და მეორე ფურცელზე ნახატი ამოქარგეთ. დათვი, ბურთი, ყვავილი, ანგელოზი, პეპელა - არჩევანი საკმაოდ დიდია. ამის შემდეგ პირველ გვერდზე ოვალური ან მართკუთხა ფანჯარა გამოჭერით, რომლის "გაღებისას" ნაქარგი გამოჩნდება.

 

როგორ შევარჩიოთ მასალა
ქსოვილიც და ძაფიც, ცხადია, ნატურალური უნდა იყოს. როგორც არ უნდა გხიბლავდეთ პოლიესტერი, აჯობებს, ჩითი გამოიყენოთ, განსაკუთრებით - თუ ბავშვს ტანსაცმელს უკერავთ. შალის ძაფი, რა თქმა უნდა, ნატურალურია, მაგრამ შესაძლოა, ალერგიის მიზეზად იქცეს, ამიტომ ეცადეთ, შალი იშვიათად გამოიყენოთ, ხოლო ამ ძაფის ფაჩუჩები და ჯემპერი პატარას ტანსაცმლის ზემოდან ჩააცვით. ის ნივთები, რომლებსაც ბავშვი უშუალოდ ეხება, ჯობს, ბამბის ძაფისგან მოქსოვოთ. ხელით შეკერილი სათამაშოები უმჯობესია სინთეპონით გატენოთ. სინთეპონი ბამბაზე უკეთ ინარჩუნებს ფორმას და მალე შრება.
არ შეიძლება სათამაშოების გამოტენა გამხმარი მცენარეებით - შესაძლოა, პატარას ალერგიული რეაქცია განუვითარდეს. სათამაშოს ან ტანსაცმლის მოსაქსოვად არც ანგორის (მოხერის) ძაფის გამოყენებას გირჩევთ - მართალია, ღუნღულა კოფთაში პატარა საყვარელ დათვის ბელს ჰგავს, მაგრამ შესაძლოა, ძაფის ბუსუსები პირში ან ცხვირში ჩაუვიდეს.

ეცადეთ, არც ერთ სათამაშოს და, საზოგადოდ, არც ერთ საგანს, რომელიც ბავშვის ხელში ხვდება, არ ჰქონდეს პატარა დეტალები, რომლებიც შეიძლება მოწყდეს. ჯობს, თვალები ამოქარგოთ, ვიდრე ღილები დააკეროთ. თუ პატარა დეტალი აუცილებელია, ის ძალიან კარგად უნდა იყოს დამაგრებული. ფერადი პომპონები და თასმები კი თვალს ნამდვილად ახარებენ. შეარჩიეთ კაშკაშა ფერები, მაგრამ ჯობს, ერთ სათამაშოში 2-3 ფერზე მეტი არ იყოს შეხამებული. თუ ბევრი დეტალი აუცილებელია, გასანეიტრალებლად თეთრი ან ბაცი ყვითელი გამოიყენეთ. გაითვალისწინეთ, რომ ახალშობილი ყველაზე უკეთ ჭადრაკისებრ და ზოლებიან ორნამენტებზე რეაგირებს.



კომენტარი არ გაკეთებულა
კომენტარი
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას,სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.
მეცნიერების აზრით, ყოველდღიურად ჩაის მიღებისას დემენციის რისკი 50%-ით მცირდება. „დემენციის გენის“ არსებობისას კი ტვინში ტოქსიური ნადებების წარმოქმნის ალბათობა 86%-ით მცირდება. აღსანიშნავია, რომ შავი და მწვანე ჩაი ტვინისთვის ერთნაირად სასარგებლოა.
რედაქციაში ბევრი წერილი შემოდის, როდესაც მკითხველს აინტერესებს როგორ მოიშორონ კოჟრები. გეტყვით, რომ აფთიაქებში იყიდება კოჟრის (ე.წ. "მაზოლის") საწინააღმდეგო "პლასტირები". მის გამოყენებამდე უნდა გაიკეთოთ თბილი წყლის აბაზანა, შემდეგ კარგად გაიმშრალოთ ის ადგილი, სადაც კოჟრი გაქვთ
იაპონია მოსახლეობის დღეგრძელობის კუთხით მსოფლიო ლიდერის პოზიციებს კარგავს. მას მალე სამხრეთ კორეა გადაასწრებს. ჯანდაცვის მსოფლიო ორგანიზაციამ გადახედა თავის პროგნოზებს და მნიშვნელოვანი ანალიზი გაუკეთა 35 განვითარებულ ქვეყანაში სიცოცხლის ხანგრძლივობის მაჩვენებლებს.
17 მაისი 2017
ამერიკელ მეცნიერთა განცხადებით, დაბერების პროცესი 39 წლიდან იწყება. ამ ასაკიდან ადამიანის გონებრივი შესაძლებლობები რამდენადმე სუსტდება, ირღვევა საყრდენ-მამოძრავებელი აპარატის ფუნქციაც.
27 აპრილი 2017
მამაკაცები, რომლებსაც ქრონიკული შფოთვა აღენიშნებათ, 2-ჯერ უფრო ხშირად ავადდებიან ონკოლოგიური დაავადებებით, ვიდრე ის პირები, რომლებსაც ფსიქიკური დარღვევები არ აწუხებთ. ამაზე მეტყველებს კემბრიჯის უნივერსიტეტის მეცნიერთა მიერ მიღებული კვლევის შედეგები.
აშშ-ის რამდენიმე შტატში ჩატარებული გამოკითხვით გაირკვა, რომ დასაქმებულთა ნახევარზე (60 %-ზე) მეტი სამუშაო დღეების ყველაზე დიდ მინუსად მიღებულ სტრესს ასახელებს. გამოკითხულთა 25 %-ს მიაჩნია, რომ ჯანმრთელობაზე ნეგატიურ გავლენას სამუშაო პირობები ახდენს.
ალკოჰოლის მოხმარება მრავალი დაავადების პროვოცირებას უწყობს ხელს. ეთანოლის გარდა, ალკოჰოლური სასმელების შემადგენლობაში შეიძლება სხვა მავნე ნივთიერებებიც იყოს. განსაკუთრებით საყურადღებოა, ზოგიერთი სახეობის სპირტიან სასმელში, შაქრის მაღალი შემცველობა, რაც ტიპი 2 შაქრიანი დიაბეტის განვითარებას იწვევს.
რეგულარულ ვარჯიშს რომ უდიდესი მნიშვნელობა აქვს ორგანიზმის ჯანმრთელობის, ნერვული სისტემის განმტკიცების, ახალგაზრდობის შენარჩუნებისა და სიცოცხლის გახანგრძლივებისთვის, ყველამ კარგად იცის. ვარჯიშის მოყვარულ ფიზიკურად აქტიურ პირებს ბევრ გამორჩეულ ნიშანთან ერთად კუნთოვანი სისტემა და კანიც უფრო ჯანსაღი აქვთ.