სამკურნალო წერილები
სამკურნალო წერილები
სამკურნალო წერილები

გარდატეხის ასაკის გამონაყარს ჭინჭარი უშველის
ჩემს ვაჟს გარდატეხის ასაკში სახეზე გამუდმებით აყრიდა. მაღალმთიან რაიონში ვცხოვრობთ, ამიტომ ჩემი ვაჟი პირველად ადგილობრივმა ექიმმა გასინჯა და ფურუნკულოზის დიაგნოზი დაუსვა. გამოგვიწერა რამდენიმე წამალი, რომლებიც ძირითადად კანის პრობლემებისთვის იყო განკუთვნილი. რამდენიმე ხანში გამონაყარი გაქრა, მაგრამ მერე ისევ გაჩნდა.


მე სამედიცინო განათლება არ მაქვს, მაგრამ უამისოდაც მივხვდი, რომ კანი არაფერ შუაში იყო, გამონაყარის მიზეზი ორგანიზმის შიგნით იყო საძიებელი და მკურნალობაც სწორედ მას სჭირდებოდა.
საგონებელში ჩავვარდი - ქალაქში ჩამოსვლა ჩვენთვის ადვილი არ იყო. ჩემი გასაჭირი მეზობლებმა შეიტყვეს.

ერთმა მათგანმა დამამშვიდა, ერთ წამალს გასწავლი და აბა, სცადე, იქნებ უშველოსო.

  • წამალი ადვილი მოსამზადებელი აღმოჩნდა: მინის ქილაში უნდა ჩაასხათ ნახევარი ლიტრი ადუღებული წყალი, შიგნით ჩაყაროთ 1 სადილის კოვზი მშრალი, დაქუცმაცებული ჭინჭრის ფესვი და 0,5 სადილის კოვზი ახალდანაყილი ნიორი. ქილას მჭიდროდ უნდა დაახუროთ თავსახური და დადგათ
    სიბნელეში 6-8 დღით. შემდეგ გაწუროთ, გადაასხათ მინისავე ბოთლში და მჭიდროდ დაუცოთ თავი. ბოთლი აუცილებლად ბნელ და ცივ ადგილას უნდა შეინახოთ.
    აი, ამ ნახარშით ვუწმენდდი ჩემს ვაჟს ყოველდღე სახეს. თუ წინათ წყლულის შეხორცების შემდეგ ნაიარევი რჩებოდა, ამ საშუალების გამოყენების შემდეგ კანი აბსოლუტურად იწმინდებოდა. ერთ თვეში ჩემს შვილს გამონაყარი სულ მთლად გაუქრა.

ნანი ოთიურიძე, სოფელი ჭრებალო


გამოიყენეთ ნაცადი ხერხები


ამ წერილით ვეხმიანები მათ, ვისაც მუხლების ტკივილი აწუხებს.
მე, ჩემს მეუღლესა და ქალიშვილს 7 წლის განმავლობაში გვტანჯავდა მუხლების ტკივილი. მისგან ბაბუაწვერამ გვიხსნა.

  • გაზაფხულობით ვკრეფ ბაბუაწვერას ყვავილებს და ნახევარლიტრიან მინის ქილაში ვყრი. ქილა კარგად რომ აივსება, ვასხამ არაყს ან სპ¬ირტს, იმდენს, რომ ყვავილები კარგად და¬იფაროს. ქილას მჭიდრო თავსახურს ვახურავ და 10 დღის განმავლობაში სიბნელეში ვდგამ.

mkurnali.geროგორც კი მუხლი ამტკივდება, ვიღებ ქილიდან ბაბუაწვერას რამდენიმე კარგად დარბილებულ ყვავილს და მტკივან ადგილს იმდენ ხანს ვიზელ, ვიდრე ყვავილებს მთელი სისველე არ გამოუვა. ასე ვიქცევი დილით და საღამოს. რა ძლიერიც არ უნდა იყოს ტკივილი, 7-10 დღეში აუცილებლად გაივლის. პირადად მე 2-3 დღეშივე ვგრძნობ შვებას.
ახლა ბაბუაწვერას ყვავილების დაკრეფა უკვე გვიანია, ამიტომ გაზაფხულამდე სამკურნალო სახვევის გამოყენებას გირჩევთ:

  • აიღეთ მატყლი ან სუფთა შალის ნაჭერი და დაასველეთ წინასწარ მომზადებულ ნახარშში. ნახარში მზადდება ნაცარქათამას ბალახის, არყის ხის ფოთლებისა და ასკილის ნაყოფისგან. უნდა აიღოთ 2-2 სადილის კოვზი, ჩაყაროთ ლიტრიან ქილაში, ქილა მდუღარე წყლით აავსოთ და ხარშოთ ორთქლზე 20 წუთის განმავლობაში. ნახარში გააცივეთ. 2 ჭიქა მაშინვე დალიეთ, რაც დარჩება, იმაში გახსენით 1 სადილის კოვზი მარილი და მეხუთედი ჩაის კოვზი ლიმონმჟავა. კარგად მოურიეთ და შიგნით მატყლი ან შალის ქსოვილი ჩადეთ. ნახევარი საათის შემდეგ, კარგად რომ გაიჟღინთება, ამოიღეთ, კარგად გაწურეთ და დაიდეთ მუხლზე. შეიხვიეთ პირსახოცით და დილამდე გაიჩერეთ. ასე გაიმეორეთ რამდენიმე დღე. უკვე 5 დღის შემდეგ იგრძნობთ შვებას.

ქეთევან ჭკადუა, სენაკი


მხსნელი ინჰალაციები


mkurnali.geგასწავლით ერთ ძველ ხალხურ საშუალებას, რომლის შესახებაც შეიძლება ზოგიერთ თქვენგანს უკვე სმენია, თუმცა ჩემი რეცეპტი ოდნავ გაუმჯობესებულია და უფრო თამამადაც გთავაზობთ. იგი სუსხიან ზამთარში ცხვირსა და სასუნთქ გზებთან დაკავშირებული ნებისმიერი პრობლემის მოგვარებაში დაგეხმარებათ.
დიდხანს ვიტანჯებოდი სურდოთი. მეგონა, ჰაიმორიტი მჭირდა, მაგრამ ექიმებმა ეს დიაგნოზი არ დაადასტურეს. საკმარისი იყო, გავციებულიყავი, რომ ცხვირი ისე მეჭედებოდა, აღარც სუნთქვა შემეძლო და აღარც ნორმალურად ლაპარაკი. ცხვირში ჩასაწვეთებელი წამლები ცოტა ხანს მშველოდა, შემდეგ კი ყველაფერი თავიდან იწყებოდა.
ყველას გაგვიგონია, რომ სურდოს დროს სასარგებლოა კარტოფილის ნახარშის ინჰალაცია, ცოტა ხნის წინ კი ამ რეცეპტის გაუმჯობესებულ ვარიანტს გადავაწყდი, რომელსაც უფრო ძლიერი ეფექტი აქვს.

  • კარტოფილი კანიანად მოხარშეთ და დაუმატეთ ნახევარი ჩაის კოვზი პროპოლისი - სწორედ ის ზრდის პროცედურის სამკურნალო ძალას.
    მკურნალობის კურსი მოიცავს 10 პროცედურას. ჩაიტარეთ დღეგამოშვებით.
    გახსოვდეთ: ინჰალაციის შემდეგ არ შეიძლება შინიდან გასვლა.

ლევან ხოტენაშვილი, სიღნაღი

 


ცისტიტს არყის ხის კვირტი შველის


ცოტა ხნის წინათ ჩემი 30 წლის ქალიშვილი გამომიტყდა, მუცლის ქვედა ნაწილში საშინელი ტკივილები დამეწყოო. მალე მეც შევამჩნიე, რომ საპირფარეშოში სიარულს მოუხშირა. მივხვდი, ცისტიტი სჭირდა. უქმეებზე შვილთან ერთად ექსკურსიაზე იყო ქალაქგარეთ და იქ გაცივდა. ექსკურსიიდან რომ დაბრუნდნენ, ლამის გული გამისკდა გაფითრებული შვილისა და მუხლებგადატყავებული შვილიშვილის დანახვაზე, მაგრამ არ დავბნეულვარ და ორივე ერთი და იმავე წამლით მოვარჩინე.

  • უნდა აიღოთ 20 გრამი არყის კვირტი და დაასხათ  100 მლ 70-პროცენტიანი სპირტი, 3 კვირით დააყენოთ შუქგაუმტარ ჭურჭელში, შემდეგ გადაწუროთ და შეინახოთ მუქი მინის ქილაში გრილ და ბნელ ადგილას.

ცისტიტის სამკურნალოდ 20 წვეთი ნაყენი უნდა გააზავოთ 1 სადილის კოვზ წყალში და სვათ დღეში ერთხელ, ორი კვირის განმავლობაში.
ჩემს შვილიშვილს გადატყავებული მუხლები ამავე ნაყენით დავუმუშავე და ჭრილობები თვალის დახამხამებაში შეუხორცდა.
ძალიან გამიხარდება, თუ ჩემი რეცეპტი ვინმეს გამოადგება.

ლაურა გილაური, კასპი

 


ჩავიტაროთ თირკმელების პროფილაქტიკა წითელი მოცხარით


ორსულობისას ხშირად მტკიოდა თირკმელები, თუმცა პათოლოგიური ცვლილებები არ მქონია. დედამ ტკივილები გადაღლას და მძიმე ორსულობას დაუკავშირა, მაგრამ წელის არეში დისკომფორტი მშობიარობის შემდეგაც დამრჩა.
პატარას ძუძუთი ვკვებავდი, ამიტომ ხალხური საშუალებებით მკურნალობა ვარჩიე.
ამ რეცეპტით უკვე რამდენიმე წელია ვმკურნალობ, ყოველ წელს ვიტარებ თირკმელების პროფილაქტიკას და დარწმუნებული ვარ, რომ მოცხარი მათი საუკეთესო პროფილაქტიკოსია.

  • 3 სადილის კოვზ წითელი მოცხარის ფოთოლს უნდა დაასხათ 0,5 ლიტრი ადუღებული წყალი, ფოთლები კარგად გამოწუროთ და ნაყენი შემოდგათ ცეცხლზე, წამოადუღოთ და ჩაყაროთ მასში 2 სადილის კოვზი მოცხარის ცოცხალი ან ხმელი ნაყოფი. ისევ წამოადუღოთ, ქურიდან გადმოდგათ და გააცივოთ. უნდა მიიღოთ დღეში ნახევარი ჭიქა.

მკურნალობის ყველაზე დიდი ღირსება ის არის, რომ ნახარშის სმა მანამდე შეიძლება, სანამდეც მოისურვებთ. მას უკუჩვენება არ გააჩნია. თანაც მარტო თირკმელებს კი არ წმენდს, არამედ აუმჯობესებს ორგანიზმის ზოგად მდგომარეობას და განწყობილებას.

ნათია ავსაჯანიძე, თბილისი

 

mkurnali.geროცა შაქრიანი დიაბეტი გაქვთ, მცენარეებზე უარს ნუ იტყვით


55 წლის ვარ. ორი წლის წინ ძლიერი სტრესის შემდეგ სისხლში შაქარმა ამიწია. დამინიშნეს დიეტა და წამლები. იქნებ არც კი დაიჯეროთ, რომ მცენარეული ნაყენით დიაბეტის მკურნალობა შეიძლება, მაგრამ მე ეს საკუთარ თავზე გამოვცადე, ამიტომ თამამად გასწავლით რეცეპტს:

  • აიღეთ თითო სუფრის კოვზი ხბოშუშხას ბალახი, ლობიოს ჩენჩო (პარკები უმარცვლოდ), მოცვის ნაყოფი, ჭინჭრის ფოთლები. წვრილად დაკუწეთ, ერთმანეთში აურიეთ და დაასხით 4 ჩაის ჭიქა მდუღარე წყალი. გააცივეთ, გადაწურეთ და მიიღეთ თითო ჭიქა დღეში 3-4-ჯერ ჭამის წინ.
ნარგიზა ციმაკურიძე, ბათუმი

წნევას ბალახეულის ნაყენიც  დაგიქვეითებთ

უკვე 45 წელს გადავაბიჯე და წნევა პერიოდულად მიწევს, განსაკუთრებით - გაზაფხულსა და შემოდგომაზე, აგრეთვე - ეგრეთ წოდებულ მაგნიტურ დღეებში. მართალი გითხრათ, მედიკამენტური მკურნალობის სურვილიც კი არ გამჩენია. უპირატესობა რატომღაც იმთავითვე მცენარეულ საშუალებებს მივანიჭე. ისინი წნევასაც აქვეითებს და ძილსაც აწესრიგებს.

  • აიღეთ 3-3 სუფრის კოვზი შავბალახა, ბერულას ბალახი, კუნელის ყვავილი, ფითრის ფოთლები ერთწლიანი ყლორტებით. ნარევს დაასხით 1 ლიტრი მდუღარე წყალი და გააგრილეთ. შემდეგ გადაწურეთ და მიიღეთ ნახევარი ჩაის ჭიქა დღეში 3-ჯერ, ჭამამდე ნახევარი საათით ადრე.

ქეთევან აბულაშვილი, სიღნაღი

 


ნაღვლის ბუშტის კენჭოვანი დაავადების დროს...


რამდენიმე წლის წინ მარჯვენა ფერდი ამტკივდა. ექოსკოპიაზე მითხრეს, რომ ნაღვლის ბუშტში კენჭები მქონდა და ოპერაცია შემომთავაზეს, მაგრამ ჯერჯერობით თავს ვიკავებ. ჩემმა თანამშრომელმა, რომელსაც იგივე პრობლემა აქვს, ამ ნარევის მიღება მირჩია:

  • უნდა აიღოთ თითო სუფრის კოვზი დათვისკენკრას ფოთოლი, მატიტელას ბალახი, სიმინდის ულვაში, ლობიოს ჩენჩო (პარკები უმარცვლოდ), ქაფუნას ბალახი. ამ ნარევს დაასხათ 2 ჩაის ჭიქა მდუღარე წყალი, გააცივოთ, გადაწუროთ და მიიღოთ თბილ-თბილი, ნახევარი ჩაის ჭიქა დღეში 3-ჯერ.

ა. ბალავაძე. თბილისი

 


mkurnali.geგულის ნევროზს  ფიტოწამალი  მოგირჩენთ


გასულ ზაფხულს სტრესი გადავიტანე, მას შემდეგ დამემართა გულის ნევროზი და სისუსტე: პერიოდულად მიჩქარდება გული, მიჭირს სუნთქვა და არ მყოფნის ჰაერი. დამჩემდა უძილობაც. ძალიან მომიხდა ნაყენი, რომელიც დედაჩემმა მომიმზადა. რაც მისი სმა დავიწყე, ძილიც მომიწესრიგდა და აღარც გულს ვუჩივი.

  • აიღეთ თითო ჩაის კოვზი კატაბალახას ფესვი, ბარამბოს ფოთოლი და 3 ჩაის კოვზი ფარსმანდუკის ბალახი. ამ ნარევს დაასხით 2,5 ჩაის ჭიქა ცივი წყალი და 3 საათით დადგით გრილ ადგილას, შემდეგ 5 წუთის განმავლობაში ხარშეთ ნელ ცეცხლზე, გააგრილეთ, გადაწურეთ და დალიეთ დღეში 1 ჩაის ჭიქა რამდენიმე ულუფად.

ნინო გეგეშიძე, თბილისი

 


როგორ მოვირჩინოთ ჰიპერაციდური გასტრიტი


რამდენიმე წლის წინ შემაწუხა გულძმარვამ, ბოყინმა და უსიამოვნო შეგრძნებებმა კუჭის არეში. მივმართე ექიმს, ჩავიტარე გამოკვლევა. აღმომაჩნდა გასტრიტი კუჭის წვენის მაღალი მჟავიანობით. დამინიშნეს მკურნალობა და ზოგიერთი კერძის მიღება ამიკრძალეს, მე კი კარგი ჭამა-სმა ძალიან მიყვარს. ერთხელ ავტობუსში შემთხვევით მოვკარი ყური ამ რეცეპტს და მოვსინჯე. მართალია, საკვებს მაინც შეზღუდვით ვიღებ, მაგრამ პირვანდელ დიეტასთან რა შედარებაა...
აი ეს რეცეპტი:

  • აიღეთ თითო სუფრის კოვზი ცაცხვის ყვავილი, სელის თესლი, ძირტკბილას ფესვი, კოთხუჯის ფესურა, პიტნის ბალახი, ცერეცოს თესლი. დაასხით 6 ჩაის ჭიქა მდუღარე წყალი, გააცივეთ, გადაწურეთ და მიიღეთ თითო ჩაის ჭიქა დღეში 2-3-ჯერ.

ბიჭიკო ჩინჩალაძე, ზესტაფონი

 

 

mkurnali.geთუ თირკმელებსა და საშარდე გზებში კენჭები გაგიჩნდათ


თირკმელები დიდი ხანია მაწუხებს. როცა საშუალება მაქვს, საირმეში მივდივარ და მინერალური წყლით ვმკურნალობ. რამდენიმე წლის წინ სტრესის ფონზე კენჭის გავლაც კი მქონდა. სწორედ მაშინ მასწავლეს მცენარეული საშუალება, რომელიც ასე მზადდება:

  • ვიღებთ თითო სუფრის კოვზ მარწყვაბალახას, წითელი მოცვის ფოთოლს, როზმარინის ფოთოლს, შვიტას ბალახს, ძირტკბილას ფესვს, გრძელწიწვა ღვიის ნაყოფს. ამ ნარევს ვასხამთ 6 ჩაის ჭიქა მდუღარე წყალს, ვდგამთ, ვაგრილებთ, ვწურავთ და ვსვამთ ნახევარ ჩაის ჭიქას დღეში 4-ჯერ.

ვალერი ქაშაკაშვილი, თერჯოლა

 


მცენარეული შარდმდენი

თქვენი ჟურნალის მუდმივი მკითხველი ვარ. განსაკუთრებით მომწონს რუბრიკა `დავეხმაროთ ერთმანეთს~. მკითხველები ძალიან საინტერესო და სასარგებლო რჩევებს გვაწვდიან. მეც მინდა, შემოგთავაზოთ მცენარეული შარდმდენი საშუალებების რეცეპტი, რომელსაც თვითონვე ვიყენებ.

  • აიღეთ თითო სუფრის კოვზი ფშნისეკალის ფესვი, ოხრახუშის ფესვი, ძირტკბილას ფესვი და გრძელწიწვა ღვიის ნაყოფი. ეს ყველაფერი დააქუცმაცეთ, დაასხით 4 ჩაის ჭიქა ცივი წყალი, დააყენეთ 6 საათს, შემდეგ ნელ ცეცხლზე შემოდგით, 15 წუთს ხარშეთ და გააცივეთ. მიიღეთ დღეში 1 ჩაის ჭიქა რამდენიმე ულუფად. აკრძალულია ორსულობის, ასევე - თირკმლისა და შარდსადინარი გზების მწვავე ანთებითი დაავადებების დროს.

ნათელა მარგველაშვილი, ქუთაისი

 


სიმინდის ულვაში შარდის ბუშტის ანთების საუკეთესო წამალია


დიდი ხანია, მაწუხებს შარდის ბუშტისა და საშარდე გზების ანთება. ვისაც ერთხელ მაინც გამოუცდია, დამეთანხმება, რა უსიამოვნო სიმპტომები აქვს ამ დაავადებას: წვა შარდვისას, გახშირებული შარდვა... ჩემმა მეგობარმა სოფლიდან მცენარეები ჩამომიტანა და მათგან წამლის მომზადებაც მასწავლა:

  • ვიღებთ თითო სუფრის კოვზ არყის ფოთოლს, დათვისკენკრას ფოთოლს, სიმინდის ულვაშს, ძირტკბილას ფესვს, ჭანგას ფესურას, ვასხამთ 5 ჩაის ჭიქა ცივ წყალს და 6 საათის განმავლობაში ვაყენებთ, შემდეგ 15 წუთს ვხარშავთ ნელ ცეცხლზე. უნდა მივიღოთ დღეში 1 ჩაის ჭიქა 3-4 ულუფად.

მარიამ ჩადუნელი, თბილისი

 


კუჭის აშლილობის წამალი


სუსტი კუჭ-ნაწლავი მაქვს და კუჭი ხშირად მეშლება. ჩამიტარეს გამოკვლევა, დამისვეს ქრონიკული კოლიტის დიაგნოზი და მკურნალობაც დამინიშნეს, მაგრამ სულ მუდამ წამლებზე ხომ არ ვიქნებოდი, ამიტომ მივმართე ჩემს მეზობელს, რომელიც კარგად იცნობს მცენარეთა სამკურნალო თვისებებს. მან ეს წამალი მომიმზადა:

  • ვიღებთ თითო სუფრის კოვზ მოცვის ნაყოფს, პიტნის ბალახს, 1,5 სუფრის კოვზ გვირილის ყვავილს. ამ ნარევს ვასხამთ 3,5 ჩაის ჭიქა მდუღარე წყალს, ვაცივებთ, ვწურავთ და ვიღებთ ნახევარ ჭიქას დღეში 3-4-ჯერ.

მაგდა ჩომახიშვილი, ხაშური