ვინ ვეღარ ისარგებლებს ერთდროულად საყოველთაო ჯანდაცვისა და კერძო სადაზღვევო პაკეტით
დეტალების შესახებ შრომის, ჯანმრთელობისა და სოციალური დაცვის მინისტრმა დავით სერგეენკომ ბრიფინგი გამართა.
საშუალო შემოსავლის მქონე მოქალაქეების რაოდენობა, რომელთა ყოველთვიური შემოსავალი 900 ლარზე მეტია, მაგრამ წლიური შემოსავალი 40 000 ლარს არ აღემატება 300 000-ს შეადგენს. მათ კერძო სადაზღვევო შემავსებელი პაკეტით სარგებლობის პრივილეგია არ ეძლევათ.
”მათ ექნებათ ასეთი არჩევანი: ან უნდა ჰქონდეთ საყოველთაო ჯანდაცვის პაკეტი, ან უნდა აიღონ კერძო სადაზღვევო პაკეტი. ორივეთი ერთად სარგებლობის უფლება, პრივილეგია, მათ არ მიეცემათ. საყოველთაო ჯანდაცვაში მათ არსებულ პაკეტში გარკვეული ცვლილებები მოხდება. ის არის საშუალო შემოსავლის მქონე ადამიანი, რომელმაც გარკვეული, მცირე დანახარჯი უნდა გასწიოს თავისი ჯანდაცვისათვის, რათა დაზოგილი თანხები გადავამისამართოთ მედიკამენტის კომპონენტში და მივცეთ მედიკამენტები მათ, ვისაც ეს ყველაზე უფრო მეტად სჭირდება", - განმარტა ჯანდაცვის მინისტრმა.
იმ შემთხვევაში, თუკი ასეთი კატეგორიის მოქალაქე საყოველთაო ჯანდაცვის პაკეტს აირჩევს, ურგენტული სტაციონარით სარგებლობის შემთხვევაში ის სახელმწიფოსგან მიიღებს 90 პროცენტიან დაფინანსებას, ხოლო თავად 10 პროცენტის გადახდა მოუწევს. გასულ წლებში სახელმწიფო ურგენტულ სტაციონარს 100 პროცენტით აფინანსებდა.
"გარდა ამისა, თუკი გეგმურ სტაციონარში რაიმე მკურნალობა ჯდება 1000 ლარზე ნაკლები, ასეთ შემთხვევაში ამ კატეგორიის პირებმა თვითონ უნდა გადაიხადონ ეს თანხა. ხოლო თუკი 1000 ლარს ასცდა, 1001 ლარიდან ზევით, მათზე უკვე განხორციელდება ის ლოგიკა, რითაც მუშაობს საყოველთაო ჯანდაცვა. გეგმურში ეს არის 70%-იანი გადახდა სახელმწიფოს მხრიდან, 30% მათ მიერ. ხაზს ვუსვამ, რომ მათ ვერ მიეცემათ პრივილეგია ისარგებლონ ორივეთი - შეინარჩუნონ საყოველთაო ჯანდაცვა და შეიძინონ ზედნაშენი”, - განმარტა დავით სერგეენკომ.
ამასთან, აღნიშნულ კატეგორიას ჯანდაცვის სახელმწიფო სხვა პროგრამები უნარჩუნდება, ისეთი როგორიცა არის, მაგალითად, C ჰეპატიტის მკურნალობა, ინფექციური დაავადებები, ტუბერკულოზი, დიაბეტი, ინსულინდამოკიდება და სხვ.