მკითხველის გამოხმაურება: გიამბობთ, როგორ მოვიწამლეთ გაზით ოჯახის ყველა წევრი
მეც მაქვს სახლში წყლის გამაცხელებელი, რომელიც გაზზე მუშაობს. სამი შვილი მყავს. შარშან ზამთარში, ერთ დღეს ძალიან ძლიერი ქარი ქროდა. შინ მე და ბავშვები ვიყავით. ბავშვებმა დაბანა მოინდომეს. ჯერ ერთმა იბანავა, მერე მეორე შევიდა აბაზანაში. წყლის გამაცხელებელი სამზარეულოში გვაქვს დამონტაჟებული. ფანჯარა ოდნავ შეღებული კი გვქონდა სამზარეულოში, რადგან სხვაგვარად ქარი აქრობდა გამაცხელებელს, მაგრამ, როგორც ჩანს, ეს არ აღმოჩნდა საკმარისი.
ყველანი მისაღებ ოთახში ვისხედით. მე ჩემს საქმეს ვაკეთებდი, ბავშვები კი კომპიუტერთან თამაშობდნენ. უცბად ვიგრძენი, როგორ მომიჭირა თავში მარწუხებმა, გული ამიჩქარდა. პულსაცია ყურებში მესმოდა და თავში მირტყამდა. ასეთ დროს ვერაფრით ფიქრობ, რომ იწამლები, რადგან არც არაფრის სუნია ოთახში და ვერც ხილულად ხედავ
რამე საეჭვოს. სულ 1-2 წუთში თავბრუსხვევა ვიგრძენი და მერე ისე მოდუნდა ყველა კუნთი, ერთბაშად ძილისკენ წავიდა სხეული. კიდევ კარგი, ხმამაღლა ვთქვი, თავი საშინლად მტკივა-მეთქი, მეც მტკივა დედაო - ერთ-ერთმა შვილმა თქვა, მეც ძალიან მტკივაო - მეორემ და მერე უცებ წამოიძახა - გაზით ვიწამლებითო. გამაცხელებელი კი ჯერ ისევ ენთო ქარიან ამინდში. მე არაფრის თავი აღარ მქონდა, ბავშვებმა ყველა ფანჯარა გამოაღეს სასწრაფოდ. რომ შევხედე, ყველა აწითლებულიყო სახეზე. მერე ერთმანეთს ვუყვებოდით, რას ვგრძნობდით იმ წუთებში და ყველას ერთნაირი ნიშნები გვქონდა: უეცრად განვითარებული თავის ტკივილი, თითქოს თავზე რაღაც მოგიჭირეს, კისრის სისხლძარღვები დაგვეჭიმა, გული აგვიჩქარდა და მსუბუქი თავბრუსხვევა გვქონდა.
არ ვიცი, რა მოხდებოდა სულ რამდენიმე წუთში, ბავშვი რომ არ მიმხვდარიყო, რას უკავშირდებოდა ეს ყველაფერი.
მას მერე ქარიან ამინდში არასოდეს ვრთავთ გაზის გამაცხელებელს. გამოცვლით კი ჯერ ვერ შევცვალეთ.
აი, ჩვენი ისტორია, გაითვალისწინეთ და გაფრთხილდით!
წაიკითხეთ:
რატომ იწამლებიან გაზის გამათბობლით და რა უნდა ვიცოდეთ, ეს რომ არ დაგვემართოს!