რამდენი მედიკამენტის შეძენა იქნება შესაძლებელი ლარად
ამის შესახებ ჯანდაცვის მინისტრმა დავით სერგეენკომ მედიკამენტების მწარმოებელ კომპანიებთან შეხვედრის დასრულების შემდეგ განაცხადა.
მინისტრის თქმით, თუკი აქამდე ამბულატორიული მედიკამენტების მხრივ სახელმწიფო პროგრამით მოსარგეებლეები იყვნენ მხოლოდ ის ადამიანები, ვისაც ჰქონდათ 100 000 ქულაზე ნაკლები და მათზე ვრცელდებოდა მხოლოდ 23 მედიკამენტი, ეს ჩამონათვალი უნდა გაიზარდოს და მასში ცალსახად უნდა შევიდნენ ასაკით პენსიონერები, შშმ პირები და დამატებითი კონტინგენტი. წინასწარი შეფასებით 23 მედიკამენტი უნდა გაიზარდოს 50-მდე.
მისივე თქმით, წინასწარი ანალიზით სოციალურად დაუცველ მოსახლეობას ისევ უნდა შეეძლოს ჩამოთვლილი მედიკამენტების 1 ლარად შეძენა, თუმცა უკვე არა მხოლოდ 23 დასახელების, არამედ თითქმის 2-ჯერ მეტი მედიკამენტის. "რაც შეეხება ასაკით პენსიონერებს, მათ უნდა შეძლონ მინიმუმ დღევანდელი საბაზრო ფასის ნახევრად შეძენა მედიკამენტების ამ 40-45 ჩამონათვალის", - განაცხადა სერგეენკომ.
2 კვირის შემდეგ კვლავ გაიმართება შეხვედრა მედიკამენტების მწარმოებლებთან და მოხდება ამ კუთხით მონახაზების გაცვლა. "წინასწარი შეფასებით, ვფიქრობ, რომ ზაფხულის დასაწყისში უკვე შესაძლებელი იქნება ამ პროგრამის მნიშვნელოვანი გაფართოება", - განაცხადა სერგეენკომ.