შუადღის ხანმოკლე ძილი ღამით გამოუძინებელ ორგანიზმს ჩვეულ რიტმში აბრუნებს
კვლევაში მონაწილეობა მიიღო თერთმეტმა მოხალისემ. ექსპერიმენტის განმავლობაში მათ ეძინათ ღამეში მხოლოდ 2 საათი, რის შედეგადაც ყველა მონაწილეს აღენიშნებოდა სისხლში ნორადრენალინის და ინტერლეიკინ-6-ის დონის დაახლოებით 2,5-ჯერ მომატება.
ორგანიზმში ნორადრენალინი გამომუშავდება სტრესულ სიტუაციებში, შოკის, სისხლის დაკარგვის, დამწვრობის, ნერვული გადაძაბვის დროს. ინტერლეიკინ-6 ასტიმულირებს იმუნურ პასუხს, ახდენს ენერგიის მობილიზაციას, რასაც შედეგად მოსდევს სხეულის ტემპერატურის მომატება.
როგორც ექსპერიმენტმა აჩვენა, ამგვარი ღამის შემდეგ, შუადღის ერთსაათიანი ძილის პირობებში, ორგანიზმის ყველა მაჩვენებელი ნორმას უბრუნდებოდა. მკვლევარები ამტკიცებენ, რომ ამ კვლევის შედეგები უნდა გაითვალისწინონ მათ, ვისაც ქრონიკული გამოუძინებლობა აწუხებს.