რატომ არ უვითარდებათ ზოგიერთებს შიდსი
ამერიკელმა და ჩინელმა მეცნიერებმა ერთობლივი კვლევით გაარკვიეს, რომ ამ ფენომენის მიზეზი განსაკუთრებული დამცველობითი ცილების არსებობაშია. მკვლევარებმა შეისწავლეს დაინფიცირებულთა თ-ლიმფოციტები და შეადარეს დაავადებულთა იმავე ტიპის უჯრედებს, ანუ იმ პაციენტების თ-ლიმფოციტებს, რომელთა იმუნური სისტემაც დაძლია ვირუსმა.
აღმოჩნდა, რომ ძლიერი იმუნიტეტის მქონე პირების (რომლებიც დაინფიცირებულნი იყვნენ, მაგრამ არა დაავადებულნი) უჯრედების ზედაპირზე განსაკუთრებული სტრუქტურის სპეციფიკური დამცველობითი ცილებია განთავსებული.
მეცნიერები აცხადებენ, რომ გარკვეულწილად გაშიფრული ფენომენის წყალობით და იმუნური სისტემის ამ თავისებურების საფუძვლიანი შესწავლით, შესაძლებელი გახდება ორგანიზმის დამცველობითი მექანიზმების გაძლიერება და შიდსის მკურნალობის ახალი მეთოდების შემუშავება.
თინათინ გოცაძე